DILI, 28 setembru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, ba alterasaun dahuluk dekretu-lei númeru 37/2022, loron 25 maiu, kona-ba subsídiu fim do ano ba uma-kain sira.
“Intervensaun lejizlativa ne’e hala’o ajustamentu ba testu redasaun dekretu-lei ne’e hodi evita dúvida ruma kona-ba sé mak sai benefisiáriu apoiu sosiál, ho nune’e reafirma filafali desizaun hodi atribui subsídiu ba uma-kain sira hotu, ne’ebé halo ona rejistu to’o loron 28 fevereiru 2022, independentemente hosi sira iha situasaun vulneravel ka lae no mós independentemente hosi sira iha membru balun ne’ebé fó atividade profisionál iha ámbitu administrasaun públika ka lae,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Governu Aloka Millaun $63,6 ba Pagamentu Subsídiu Uma-Kain Hamutuk 318.302
Portavóz Governu, dehan, ba hirak ne’ebé hetan rendimentu ho valór boot deside lakohi simu subsídiu ne’e bele entrega hikas ba Governu ka fó apoia fali ba hirak ne’ebé presiza.
“Aplikasaun ne’e universál, katak hotu-hotu simu, signifika Prezidente Repúblika ka órgaun soberanu sira mós bele hetan hotu bainhira iha fixa família no rejistu, maibé ida-ne’e kabe ba ida-idak katak simu ka lakohi simu, lakohi simu mós la obriga, sé mak sente barak ona, lakohi simu fó fali ba maluk sira seluk ne’ebé presiza,” nia akresenta.
Bazeia ba dekretu-lei númeru 37/2022, loron 25 maiu, artigu 2, benefisiáriu sira ba subsídiu ne’e hanesan uma-kain sira ne’ebé rejistadu ona iha livru rejistu uma-kain iha suku, iha teritóriu nasionál tuir termu previstu iha diploma ministeriál númeru 49/2017 23 agostu.
Ba efeitu númeru anteriór, konsidera katak hirak ne’ebé rejistadu ona iha livru rejistu uma-kain ne’e hanesan sira ne’ebé mak rejistu ona uma-kain no rejistu válidu to’o 28 agostu 2022.
Jornalista : Antónia Gusmão
Editora : Julia Chatarina
