DILI, 03 Outobru 2022 (TATOLI)— Komisaun Anti Korrupsaun (CAC,sigla Portugés), husu ba Prezidente Repúblika, José Ramos Horta, atu veta alterasaun dahuluk dekretu-lei 37/2022, 25 maiu, kona-ba subsídiu “fim do ano” ba uma kain-sira tanba atribui ona universál, maibe la’ós ona ba ema ho rendimentu ki’ik no vulneravél.
Notísia relevante: Signi Verdial: Subsídiu $200 laharee ba kondisaun estatutu uma-kain
“Ita haree no konsidera polítika públiku ne’ebé la promove boa-governasaun, tanba ne’e, Prezidente Repúblika nesesariamente atu veta Dekretu-Lei versaun alteradu no orienta atu atribui ba duni povu kbiit la’ek.” Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten ba Agência TATOLI iha kna’ar fatin-Dili, segunda ne’e.
Tanba iha alinea daruak husi preámbulu Dekretu-Lei Númeru 37/2022, Governu fundamenta ninia motivasaun, justifikasaun no intensaun tanba-sá Governu introdús polítika subdisiu uma-kain ne’e. Governu rekoñese no konsente katak pagamentu estraordianariu (saláriu désimu terseiru ka gaji ke-13) iha “fim do ano” ba funsionariu púbiku sira durante ne’e, kria hela injustisa sosial no desigulidade iha ba sidadaun sira ne’ebé la abranje ba pagamentu ne’e, liuliu ba sira ne’ebé la iha rendimentu regulár, no la iha servisu fiksu.
Tanba ne’e Governu dekreta liuhsui Dekretu-lei ne’e nu’udar alternativa ida atu halo balansu no rekompensa ba situasaun injustisa no desigualidade ne’e, hodi garante justisa sosial no igulidade iha distribuisaun apoiu sira.
Motivasaaun ne’e konfirma iha artigu 1 alinea 2, hosi versaun orijinál Dekretu-lei ne’e define klaru ona katak subsidiu ne’e ba família ne’ebé ekonomikamente vulneralvel.
Maibé, Governu liuhosi reuniaun Konsellu Ministru, kuarta (28/09), halo ona alterasaun dahuluk bá projetu Dekretu-Lei númeru 37/2022, kona-bá subsídiu “fim do ano” ho forma uma-kain hotu iha territóriu nasionál la’ós ona atribui de’it bá família kbiit-laek ka família vulneravel.
“Funsionáriu sira simu tiha ona saláriu fulan nian, iha fim do ano sira simu tán saláriu desimu terseiru més (gaji 13), no agora sira hakarak simu tán subsídiu $200, ho subsídiu ida ne’e atu haklean injustisa ho desigualidade iha ita nia rai. Husi prespetiva no pontu-de-vista prevensaun, politika ne’ebé introdus ho ansi bele iha tendensia ne’ebé nakonu ho konflitu interese ne’e nu’udar forma ida husi korrupsaun,” Adjuntu Komisáriu ne’e lamenta
CAC mós husu orgaun Estadu hahú hosi Prezidente Repúblika no funsionariu públiku atu labele simu subsídiu $200 tanba hamosu injustisa sosiál.
“Ho alterasaun ne’e, ha’u fiar katak, ita nia Prezidente Repúblika no orgaun soberanu titulár sira seluk, no funsionáriu inklui KAK ami sei la foti osan ida ne’e,” nia kompromete.
Notísia relevante: Governu deside uma-kain hotu simu subsídiu $200
Jornalista: Natalino Costa
Editór : Florencio Miranda Ximenes
