VIQUEQUE, 02 novembru 2022 (TATOLI)-–Padre selebrante, Petrus Day, konsidera, lilin no aifunan iha loron finadu lilin mak lori naroman no haksolok salvasaun ba matebian sira iha Maromak nia renu lalehan.
“Loron finadu sarani hotu lori lilin no aifunan maka sai naroman no haksolok salvasaun ba matebian sira-nia iha Maromak nia reinu lalehan. Tanba ne’e, na’i sei buka sira ne’ebé la’o sala dalan, atu bá fali dalan loos. Mai ita reza ba matebian sira iha tempu espesiál hodi hetan rahun di’ak,” Padre Petrus Day, hateten liuhosi misa bensaun aifunan matebian, iha Parokia Nossa Senhora de Fátima, iha postu Uatulari, kuarta ne’e.
Notísia relevante: DNTT husu ba transporte públiku labele hasa’e tarifa iha finadu
Nia dehan, venerasaun nu’udar jestu hadomi ba maluk matebian sira ne’ebé husik ona mundu, tanba ne’e, tradisaun família bá vizita rate hodi sunu lilin, tau aifunan no reza ba matebian sira atu matebian sira bele moris di’ak iha reinu lalehan.
“Sarani sira iha Timor-Leste iha venerasaun maka’as ba matebian sira. Nune’e família sira sempre lori lilin no aifunan hanesan parte kultura nian. Matebian sira-nia loron kada tinan ida ita halo dala ida, fiar katak matebian sira di’ak iha lalehan no sira mós haree ita haksolok ba família no oan sira ne’ebé sei moris. Ita nafatin reza ba matebian sira hodi sira kontente no haksolok tanba ita-nia orasaun,” nia akresenta.
Misa ba matebian hahú tuku 07:00 dadeer no ramata tuku 08:00, hafoin sarani sira kontinua lori aifunan ba semitériu públiku Kaidila Bu’u, iha suku Matahoi, postu administrativu Uatulari, ne’ebé akompaña mós hosi Polísia Nasionál Timor-Leste (PNTL) Eskuadra Uatulari.
Jornalista : Vitorino Lopes da Costa
Editora : Julia Chatarina
