DILI, 03 janeiru 2023 (TATOLI) – Xefe Suku Ulmera Postu Administrativu Bazartete Munisipiu Liquiça, Martinho Correia informa konstrusaun ba Uma Kbiit Laek (UKL) iha Suku Ulmera foin atinje 50% tambá material mak tarde.
“Uma Kbiit Laek ba tinan 2022 iha Ulmera foin mak atinje 50%, konstrusaun dadaun ne’e la´o namanas hela, maibé material mak tarde, fiar katak fulan hira tan bele finaliza ona,” dehan Martinho ba Agência TATOLI iha Dili, tersa ne’e.
“Ita iha difikuldade lubuk ida mak halo UKL ne’e tarde oituan, uma hirak ne’e balu kareta susar atu tula rai-henek, batako no seluk tan tamba tempu udan kareta labele tama, entaun ne’e mak dada to’o agora, maibé konstrusaun la´o normál hela, ne’ebé fulan hira tan konstrusaun foin mak bele remata”, nia dehan.
UKL iha Ulmera família kbiit laek hamutuk 12 mak hetan oportunidade, benefisiáriu hirak ne´e kompostu hosi aldeia sia hanesan, Ermeta, Esirat, Fatubesilolo, Mane-Muno, Mane-Mori, Nauner, Neran, Titisari no Terlau.
Total orsamentu kada uma ida $17.000 no uma 12 ne’e ho totál osan hamutuk mil $204.
Xefe Suku rekorda iha 2021 UKL iha Ulmera hetan uma tolu no família kbiit la´ek tolu mak sai benefisiáriu.
Jornalista:Hortencio Sanchez
Editór : Zezito Silva
