DILI, 01 fevereiru 2023 (TATOLI)—Prezidente Repúblika (PR), José Ramos Horta, kuarta ne’e, simu karta kredensiál hosi Embaixadór hosi nasaun 11 ne’ebé kompostu hosi Embaixadór rezidente rua (2) no non-rezidente na’in-sia (3).
“Ohin, Prezidente Repúblika simu karta kredensiál hosi Embaixadór nasaun 11, balun permanente rezidénsia iha ne’e no balun non rezidénsia,” Vise Ministru Negósiu Estranjeiru no Kooperasaun (MNEK), Julião da Silva, hateten ba jornalista sira iha Palásiu Prezidensiál Nicolau Lobato, Bairru Pite, kuarta ne’e.
Tuir ajenda, iha kinta (02/02/2023) ne’e, Xefe Estadu sei hala’o enkontru bilaterál ho Embaixadór kada nasaun hodi ko’alia kooperasaun Timor-Leste ho nasaun sira oinsá hodi haree ba oin.
Nia informa, embaixadór sesante sira balun nia mandatu ramata ona no karta kredensiál foin hetan aprovasaun hosi Xefe Estadu, tanba durante ne’e PR iha ajenda vizita Estadu barak ba li’ur, nune’e Embaixadór foun sira-ne’e sei subtitui fali Embaixadór sesante sira.
Durante simu karta kredensiál, PR hala’o reuniaun minutu balun ho Embaixadór sira hodi partilla situasaun jerál seguransa, ekonomia, kulturál.
Entertantu, iha serimónia simu karta kredensiál ne’ebé hala’o iha Palásiu Prezidensiál Nicolau Lobato ne’e, sei simu ho moradór no parada militár iha portaun entrada.
Enkuantu, Embaixadór na’in-11 ne’e mak hanesan Embaixadór rezidente Repúblika Korea, Shin Mantaek, Embaixadóra rezidente Rezidenre Cuba, Grisel Alina Aldama Innis, no Embaixadór non rezidente mak hanesan Embaxadór Singapura, Robin Hu, Embaixadór Equadór, Santiago Javier Chávez-Pareja, Embaixadór Repúblika Dominika, Briunny Garabito Segura.
Embaixadór Repúblika Kroasia, Nebojṧa Kahorovic, Embaixadór Reinu Bélgica, Frank Leon L. Felix, Embaixadora Hungária, Lilla L. Karsay, Embaixadór Repúblika Perú, Luis Raul Tsuboyama Galvan, Embaixadór Finlándia, Jukka-Pekka Kaihilahti, Embaixadór Kosovo, Jetnira Berdynaj Shala.
Jornalista : Nelson de Sousa
Editór : Cancio Ximenes
