DILI, 15 fevereiru 2023 (TATOLI)– Konsellu Ministru aprova alterasaun ba orgánika Ministériu Agrikultura no Peska (MAP) nian, ne’ebé aprezenta husi ministru tutela, Pedro dos Reis.
“Alterasaun ida-ne’e ho ninia objetivu atu reestrutura servisu sira ministériu nian atu estabelese enkuadramentu ida-ne’ebé estruturadu liu hodi haforsa polítika Governu nian ba setór Kuarentena no Bioseguransa”, Ministru Prezidénsia Konsellu Ministru hateten iha Palásiu Governu.
Fidélis Magalhães esplika ho alterasaun ne’e prosede promosaun husi servisu sira Kuarentena no Bioseguransa iha ministériu no diresaun-jerál ida-ne’e, atu kumpre didi’ak padraun internasionál sira, iha matéria sanitária no fitosanitária, ne’ebé estabelese liuhusi organizasaun internasionál iha ne’ebé Timor-Leste sai nu’udar membru.
Lembra katak Governu aprova ona, iha 2020, alterasaun dahuluk ba Dekretu-Lei númeru 19/2019, 31 jullu, kona-ba orgánika MAP.
Projetu dekretu-lei ne’e ho objetivu atu armoniza substánsia lei orgánika ministériu nian ho atuál Lei Orgánika VIII Governu Konstitusionál, atu prevee estrutura orgánika ezistente hosi Vise-Ministru Agrikultura no Peska.
Dekretu-lei ne’e inklui mós aprovasaun logotipu MAP ofisiál ne’ebé tau iha dokumentu no impresu tomak ministériu ne’e.
Jornalista: Antónia Gusmão
Editora: Maria Auxiliadora
