OÉ-CUSSE 16 fevereiru 2023 (TATOLI) – Servisu Diresaun Rejionál Edukasaun iha Rejiaun Administrativa Espesiál Oé-Cusse Ambeno (RAEOA), laiha autorizasaun hosi Ministériu Edukasaun, juventude no Desportu (MEJD) atu trata profesór voluntáriu sai legalidade iha períodu prosesu ensinu aprendizajen.
“Profesór voluntáriu, ita laiha tratamentu ne’ebé legál tuir Governu tanba iha esperiénsia 2010, Oé-Cusse enfrenta problema boot kona-bá voluntáriu sira tanba númeru boot, entaun sira ejize hotu atu sai legál entaun ita ulun moras atu rezolve oinsá,” Diretór Edukasaun Oé-Cusse, Daniel Mauno, hatete iha Oé-Cusse, kinta ne’e.
Nia informa, iha 2012 edukasaun Oé-Cusse konsege rezolve tiha problema ne’e, kontrata profesór voluntáriu sira hotu kauze 200-resin maibé ne’e mós hanesan faze ikus nian iha Oé-Cusse, tanba depois hosi Ministériu Edukasaun hasai kedas sirkulár ida katak, voluntáriu iha RAEOA la autoriza ona atu kria tán iha munisipíu sira.
“Entaun ita iha RAEOA kaer metin sirkulár ida-ne’e to’o ohin loron, sei hakarak voluntáriu bele konsulta ho eskola idak-idak tama aprende no hanorin, maibé liuhosi edukasaun, ita la autoriza atu hetan tratamentu legál, ita só trata de’it ema-ne’ebé simu ona osan Estadu nian, signifika sira-ne’ebé funsionáriu kontratadu no permanente, ida-ne’e maka ita trata tanba sira iha direitu,” nia katak.
Agora, kona-bá voluntáriu sira bele iha fatin hotu iha Oé-Cusse, maibé la liu hosi Diresaun Edukasaun Rejionál hanesan prosesu legál ida, maibé karik iha vaga konskursu ruma, sira bele partisipa, naran katak sira iha nível kualifikasaun akadémika iha área edukasaun.
“Iha diresaun Edukasaun Oé-Cusse laiha lista kona-bá profesór voluntáriu, ita laiha lista ema ida atu sai voluntáriu, maibé iha eskola parese iha tanba ita la autoriza trata profesór voluntáriu espesiál,” nia katak.
Jornalista: Abílio Elo Nini
Editór: Evaristo Soares Martins
