BAUKAU, 04 Juñu 2026 (TATOLI)—Kadaver Maktoban Padre Agostinho da Costa tuir planu sei haloot iha semitériu dioseze ne’ebé lokaliza iha Igreja Parókia Sagradu Korasaun de Jesus Vila Nova, Tirilolo, Postu Administrativu Baukau Vila.
Maktoban Padre Agostinho da Costa rasik iha Kinta dadeer ne’e purvola tuku 10:00 Otl translada ona husi husi rezisténsia privadu Makada’e, Bulekomu, Suku Bahú bá Igreja Pro Katedrál São José Vila Antiga Baukau no atuál sarani sira kontinua presta omenajen ikus inklui valeda no misa tuir oráriu ne’ebé fó-sai husi parte diozese.
Notísia relevante: Sarani Dioseze Baukau lakon Padre Agostinho da Costa
Bainhira Maktoban Padre Agostinho da Costa to’o iha Katedrál, kontinua kedas ho misa akompaña husi família no sarani sira, ne’ebé prezide husi Padre Aderito Victor, SDB.
Bispu Dioseze Baukau, Don Leandro Maria Alves, esplika parte Dioseze Baukau deside halo transladasaun kadaver Padre Agostinho da Costa bá Katedrál tanba hakarak fó espasu ba sarani sira atu presta omenajen ikus no hasa’e orasaun antes haloot iha semitériu dioseze iha Parókia Sagradu Korasaun de Jesus, Vila Nova, Sesta (05/06/2026).
Tuirmai oráriu velóriu ka misa kada parókia ho responsavel Dioseze Baukau husi oras meudia tuku 12:00 to’o kalan 01:00 hanesan misa dahuluk husi sarani Parókia Manatutu, tuir departementu hotu Dioseze Baukau, tuir fali misa husi sarani Arkedioseze Dili, Parókia Same, Bekora no Iliomar iha kalan tuku 19:00 Otl.
Seluk, Autoridade Munisipál Baukau (AMB) tuku 20:00 Otl, sarani Parókia Santo António Vila Antiga, Sagradu Korasaun de Jesus Vila Nova, relijiozu no seminarista tuku 22:00 Otl, misa husi sarani Dioseze Maliana, Vigária Manatutu no Baukau tuku 23:00 Otl no remata ho misa husi sarani Vigária Lautein no Vikeke tuku 00:00 Otl.
Enkuantu, oráriu ba aban loron Sesta, 05 Maiu, sei hahú ho velóriu iha madrugada tuku 05:00 Otl, kontinua ho laudes husi padre, madre, diákonu, seminarista inklui sarani sira iha tuku 07:00 Otl, misa eukaristia prezide husi Bispu Dioseze Baukau, Don Leandro Maria Alves tuku 10:00 Otl antes bá haloot iha semitériu Dioseze Baukau iha Vila Nova.
Padre Agostinho da Costa hala’o misaun nu’udár saserdote durante tinan 55 iha-ne’ebé simu ordenasaun saserdotál iha loron 22 Agostu 1971 no hakotu-iis iha Ospitál Rejionál Eduardo Ximenes (HoREX-sigla portugeza) Baukau tanba sofre moras fuan no fatór idade iha loron 03 Juñu 2026.
Jornalista: Natalino Belo
Editór: Xisto Freitas da Piedade
