DILI, 05 Juñu 2026 (TATOLI)–Polísia Nasionál Timor-Leste (PNTL) Liuhusi Komandu Munisípiu Manatutu, hamutuk ho Diresaun Servisu Investigasaun Kriminal (DSIK), konsege detein kondenadu ho inisiál JS tanba halo abuzu sexuál kontra menór ho inisiál ARFS ne’ebé akontese iha tinan 2018, tuku 20:00 kalan iha Aldeia Guarda-Iliheu, Suku Sau, Postu-Administrativu Manatut Vila, Munisípiu Manatutu.
Ministériu Públiku (MP) akuza kondenadu JS ho krime abuzu sexuál ba menór tuir artigu 177 husi Kódigu Penál Timor-Leste. Artigu ne’e hateten;
- Sé maka prátika koitu vajinál, koitu anál ka koitu orál ho labarik ne’ebé seidauk iha tinan 14 sei hetan pena prizaun tinan 5 to’o tinan 20.
- Sé maka prátika aktu sexuál relevante ho labarik ne’ebé seidauk iha tinan 14 sei hetan pena prizaun tinan-lima to’o tinan 15.
Kondenadu nia hahalok ne’e priense krime ne’ebé mak MP imputa ba nia, nune’e Tribunál Judisiál Primeira Instánsia Baukau kondena JS ho pena prizaun.
Notísia relevante : Tribunál aplika Prizaun Preventiva ba arguidu na’in-tolu kazu abuzu sexuál
Nune’e, iha Kinta (04/06) orisehik maizumenus tuku 19:00, Komandu Munisípiu Manatutu hamutuk ho DSIK ezekuta Mandadu Tribunál Judisiál Primeira Instánsia Baukau NUK 0125/18.PNSIC, buka tuir kondenadu nia paradeiru no deskobre JS no detein kondenadu JS iha área Kolmera, Munisípiu Dili.
Hafoin detein koodenadu iha Sesta (05/06), ohin tuku 10:00 halo tiha sertifikasaun ba kondenadu no lori kedan kondenadu ba estabelesimentu Prizionál Bekora hodi kumpre nia pena.
Jornalista : Natalino Costa
Editora : Julia Chatarina
