DILI, 10 marsu 2023 (TATOLI)—Diretór Ezekutivu FONGTIL, Valentim da Costa Pinto, hateten objetivu FONGTIL realiza diálogu ne’e atu introdús polítika esterna Governu nian ba organizasaun naun governmentál (ONG) sira-nian atu kontribui ba polítika ida-ne’e.
“Presiza ita-nia servisu kooperasaun hodi halo kritika, ita hanesan sosiedade sívil, kritika sira hanesan ONG no laiha proibisaun atu ita kritika Governu no polítika ne’ebé ita halo liu-liu polítika esterna ne’ebé sei fó impaktu ba ema hotu, ” Diretor Valentim hateten nia diskursu iha abertura diálogu, sesta ne’e.
Nia dehan, objetivu mak oinsá atu fahe informasaun kona-ba polítika sira-ne’ebé afeta ba aspetu dezenvolvimentu tomak relasiona ho progresu no dezafiu sira Timor-Leste hasoru perante tinan 20 mai to’o agora.
Objetivu seluk mak oinsá koko parte hosi sosiedade sívil sira no ONG nafatin mantein servisu kolaborasaun hamutuk ne’ebé besik liu hodi bele Estadu no Governu implementa polítika ho di’ak.
Hafoin tinan 20 restaurasaun independénsia, buat barak mak halo tiha ona ho polítika esterna ne’ebé hahú hosi polítika rekonsiliasaun nian ne’ebé implementa tiha ona no la’o ho kualidade lei nian iha nasaun ne’e.
Nia hateten, demokrasia iha Timor-Leste ne’e la’ós de’it di’ak iha ASEAN maibé iha mundu tomak tanba ONG no públiku sira bele vota lahó ta’uk ba ameasa sira.
“Ami halo ona esforsu ba papél Timor-Leste nian iha komunidade internasionál no tinan ida-ne’e tinan 12 ona Timor-Leste koko atu adere ba ASEAN no ida-ne’e sai nu’udar lisaun ba ami atu hametin situasaun doméstika ne’ebé sei garante polítika esterna,” nia dehan.
Diretor Jerál Asuntu Bilaterál iha Ministériu Negósiu Estranjeiru no Kooperasaun (MNEK), Crisogno Araújo, esplika katak polítika esterna ne’e ninia objetivu mak atu defende independénsia nasaun nian no salvaguarda seguransa Nasionál, aumenta pás internasionál, no hametin maun-alin sira entre nasaun sira.
“Laiha nasaun ida iha mundu ne’ebé izola-an hosi nasaun Estranjeiru sira, maske iha Konstituisaun, ita-nia polítika esterna ne’e atu hametin relasaun ho nasaun amigavel sira ho objetivu atu mantein relasaun rejionál no identidade Nasionál, dezenvolvimentu ekonómiku no sira seluk ne’ebé iha impaktu ba ita-nia sosiedade,” nia dehan.
Jornalista : Osória Marques
Editór : Cancio Ximenes
