DILI, 13 marsu 2023 (TATOLI)—Deputadu hosi bankada KHUNTO no atuál Vise Prezidente Parlamentu Nasionál, Luis Roberto, husu Governu atu aselera pagamentu subsídiu fim do ano $200 ba uma kain ba reklamante sira iha territóriu nasionál.
Notísia Relevante: Tempu badak, Governu halo pagamentu ba reklamante subsídiu $200
“Subsídiu $200 ne’ebé fó ba ita-nia komunidade até a data balun mós seidauk simu, reklamasaun lubun ida-ne’ebé hatama ona ba Governu, halo nusa mak aselera ida-ne’e molok mandatu ida ne’e ramata,” Deputadu Luis Roberto hato’o liuhosi reuniaun plenária PN, segunda ne’e.
Nia dehan, klaru buat hotu husu emerjénsia tenke responde ho emerjénsia labele ita husu ho kontestu emerjénsia ita responde sees tiha hosi ne’e, ida-ne’e mak dala barak povu hato’o katak ita serbisu ladún di’ak kona-ba atendimentu.
Iha parte seluk, Deputadu hosi bankada Governu ne’e husu mós Governu halo distribuisaun Cesta Bázika atu kontrola empreza distribuidór sira hodi garante kualidade produtu ba populasaun.
“Cesta bázika ne’ebé distribui hosi ita-nia Governu presiza kontrola másimu, tanba aihan balun la merese atu distribui ba komunidade sira,” nia dehan,
Deputada FRETILIN, Nelia Menezes, hateten tuir dekretu-lei ne’ebé Konsellu Ministru (KM) aprova ona iha fulan-janeiru liubá katak distribuisaun cesta bázika to’o iha fulan maiu, maibé iha postu balun to’o agora seidauk distribui, nune’e husu atu aselera prosesu distribuisaun.
“Iha Viqueque iha postu sira seluk hetan ona, maibé iha postu administrativu Uatukarbau, suku neen to’o ohin loron seidauk hetan cesta bázika. Tanba ne’e, ha’u husu ba Governu atu bele aprezenta tanbasá mak to’o agora komunidade seida’uk bele simu cesta básika, hanesan mós komunidade sira hosi postu sira seluk,” nia hateten.
Hatán ba ida ne’e, Sekretáriu Estadu Komunikasaun Sosiál (SEKOMS), Merício Juvinal Akara, rejista hela preokupasaun deputadu sira-nian no sei enkamina ba ministéiru tutela.
Notísia relevante: Governu sei altera dekretu-lei subsídiu $200 atu selu reklamante sira
Jornalista : Nelson de Sousa
Editór : Cancio Ximenes
