VIQUEQUE, 28 fevereiru 2023 (TATOLI)— Vise Ministra Solidaridade Sosiál no Inkluzaun (MSSI), Signi Chandrawati Verdial, informa tempu badak nian laran Governu halo pagamentu ba lista reklamante sira ba subsídiu fim do ano ho montante $200.
“Ami hahú verifika lista reklamante ka uma-kain sira ne’ebé seidauk simu subsídiu fim do ano $200 iha tinan kotuk, daudaun ne’e prosesa atu halo pagamentu”, Vise Ministra ne’e hateten ba jornalista sira, iha salaun administrasaun munisípiu Viqueque, tersa ne’e.
Governu liuhosi ekipa tékniku sira halo hela verifikasaun ba lista reklamante sira tanba lista balu dupla no balu simu ona, maibé sira-nia naran sei sai iha lista reklamante.
“Iha prosesu verifikasaun ne’e, ho durasaun semana-rua hanesan ne’e, bainhira prosesu verifikasaun hotu, ami sei halo pagamentu ba benifísiáriu reklamante sira iha teritóriu laran tomak”, nia hato’o.
Lista reklamante husi teritóriu nasionál ho uma-kain na’in-8.812. Enkunatu munisípiu Viqueque iha lista reklamente purvolta uma-ka’in na’in-112.
Molok ne’e, benefisiáriu ba subsídiu fim do ano iha munisípiu Viqueque lista uma-kain-23.671 kompostu husi postu administrativu Lacluta 2.321, Ossu 5.740, Uatucarbau 2.147, Uatulari 6.014 no Viqueque vila 7.449.
Alterasaun dahuluk dekretu-lei númeru 37/2022, loron 25 maiu, kona-ba subsidiu fim do ano ba uma-kain, prosede ba atribuisaun subsídiu $200 ba kada uma-kain hotu iha territóriu Timor-Leste.
Artigu 2 iha dekretu-lei hanesan mensiona katak benefisiáriu sira ba subsidiu ne’e hanesan uma-kain sira ne’ebé rejistadu ona iha livru rejistu iha suku iha teritóriu nasionál tuir termu previstu iha diploma ministeriál númeru 49/2017, loron 23 agostu. Uma-kain ne’ebé sai benefisiáriu ba hirak ne’ebé rejistadu ona iha livru rejistu uma-kain to’o loron 28 agostu 2022.
Jornalista : Vitorino Lopes da Costa
Editór : Florencio Miranda Ximenes
