DILI, 12 janeiru 2023 (TATOLI)—Primeiru-Ministru (PM), Taur Matan Ruak, hateten Governu sei altera dekretu-lei númeru 37/2022 kona-ba subsídiu fim do ano ho montante $200 ba uma kain ho rendimentu kiik-liu, nune’e bele selu reklamante sira.
Notísia Relevante: PR Horta promulga Dekretu-Lei subsídiu “fim do ano” $200
“Ne’e horisehik levanta ona iha Konsellu Ministru (KM), ami sei halo alterasaun ba dekretu-lei hosdi selu sira-ne’ebé seidauk hetan direitu tanba osan sei iha. Tanba ne’e, sira lalika preokupa,” Xefe Governu ne’e hateten ba jornalista sira hafoin hala’o enkontru semanál ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Notísia Relevante: Xefe família 28.583 iha territóriu nasionál la simu subsídiu $200
Antes ne’e, Koordenadór Jerál Sekretariadu Tékniku Pagamentu Subsídiu Fim do Ano ba Uma Kain, iha Ministéiru Solidariedade Sosiál no Inkluzaun (MSSI), João Coimbra, hateten pagamentu subsídiu ba uma-kain iha territóriu nasionál finaliza ona iha loron 06 janeiru maibé xefe família 28.583 mak la simu subdísiu $200.
Benefisáriu ba fim do ano $200 ba uma kain ne’ebé simu ona hamutuk 311.371 ho osan hamutuk $62.274.200, hosi totál orsamentu alokadu hamutuk $67. 920.800 no osan ne’ebé fó fila ba banku rihun $5-resin.
Notísia Relevante: Presiza iha justifikasaun forte kona-ba reklamasaun hodi aprezenta ba KM
Jornalista : Nelson de Sousa
Editór : Cancio Ximenes
