DILI, 10 janeiru 2023 (TATOLI)—Koordenadór Jeral Sekretariadu Tékniku Pagamentu Subsídiu Fim do Ano Ba Uma Kain iha Ministériu Solidariedade Sosiál no Inkkuzaun (MSSI), João Coimbra, hateten pagamentu subsídiu ba uma-kain iha territóriu nasionál finaliza ona iha loron 06 janeiru maibé xefe família 28.583 mak la simu subsídiu $200.
“Pagamentu Subsídiu fim do ano ita termina ona iha 06 janeiru liubá maibé uma kain ne’ebé la hetan direitu hamutuk 28.583 ne’e hosi totál xefe família hamutuk 339.954,” João Coimbra hateten ba Agência Tatoli, iha nia kna’ar fatin MSSI, Caicoli, tersa ne’e.
Hosi númeru 28.583 ne’e, nia esplika, maiória la mosu iha fatin pagamentu, balun tanba naran la iha lista pagamentu ne’ebé mai entrega ba MSSI no seluk fali tanba benefisiáriu balun ho saláriu mensál $500 inklui iha xefe família ne’ebé mak mate no oan sira sei iha idade minoria hela entaun labele simu direitu ne’e.
Tuir nia, benefisiáriu ba subsídiu fim do ano $200 ba uma kain ne’ebé simu ona hamutuk 311.371 ho osan hamutuk $62.274.200, hosi totál orsamentu alokadu hamutuk 67.920.800 no osan ne’ebé fó fila ba banku ne’e hamutuk rihun $5-resin.
“Entaun, osan ne’ebé fila ba banku mak rihun $5-resin no daudaun ne’e ita-nia ekipa tékniku sira hamutuk ho ekipa suku hodi halo rekonsikiasaun ba balansu osan ne’ebé sira halo pagamentu no semana ne’e xefe suku sira sei remete fila-fila osan ba banku,” nia dehan.
Ekipa pagamentu iha suku sira to’o agora ne’e halo rekapitulasaun data no konsolida osan, nune’e mós konfirma papelada fízika ho papelada eletróniku ka aparellu dijitál.
“Tanba ne’e mak sidadaun hanoin ita sei halo pagamentu maibé la loos tanba pagamentu taka ona iha 06 janeiru liubá ne’e,” nia esplika.
Antes ne’e, Vise Ministra Solidariedade Sosiál no Inkluzaun (MSSI), Signi Chandrawati Verdiál, hateten sidadaun sira-ne’ebé mak la simu no naran tama reklamasaun inklui la mosu iha fatin pagamentu ne’e, ka atu selu reklamante ka lae ne’e sei hein desizaun hosi Konsellu Ministru (KM).
“Ita tenta buka dalan ida para bele rezolve, mak dalan altera dekretu-lei balun tanba iha ne’ebá la prevee ita atu selu reklamante. Maibé ida-ne’e desizaun polítika, karik iha posiblidade ka lae, ne’e kabe ba desizaun Konsellu Ministru,” Signi Chandrawati Verdiál hateten.
lha dekretu-lei 37/2022, artigu 2 ne’e hateten katak família ne’ebé sai benefisiária ne’e ninia membru ida mak nia rendimentu liuona $500 ne’e labele simu subsídiu $200.
Jornalista : Osoria Marques
Editór : Cancio Ximenes
