DILI, 13 marsu 2023 (TATOLI)—Prezidente Bee Timor-Leste, Empreza Públiku (BTL,E.P), Carlos Peloi, hateten, iha kapitál Dili, fatin balu komunidade kontinua halerik ba bee-moos tanba kauza hosi ema balu halo ligasaun ilegal ba bee-moos.
“Loos, situasaun kona-ba bee-moos iha kapitál Dili, ne’e fatin balu komunidade halerik ba bee-moos, tanba kauza ema halo ligasaun ilegal. Tanba, foin lalais udan tun bee merak entaun ita la bele fornese bee-moos ba komunidade sira,” Carlos Peloi, hateten iha salaun BTL,E.P Caicoli, Dili, segunda ne’e.
Nia dehan, ema ne’ebé halo ligasaun ilegál ba bee-moos ida ne’e impaktu boot tebes ba komunidade seluk tanba sira labele asesu ba bee-moos.
“Esforsu ne’ebé ami halo mak orienta ami-nia enjineiru sira, liuliu ami-nia operasaun no manutensaun sira, tun ba terrenu haree situasaun sira ne’e, hodi atende lalais,” nia dehan.
Nia dehan, durante BTL,E.P nia enjineiru sira tun haree situasaun sira iha terrenu liuliu ba sira ne’ebé halo ligasaun ilegál ekipa tékniku identifika fó xamada atensaun liuhosi karta notifikasaun formal ruma ba ema ne’ebé halo koneksaun ilegál durante loron sanolu atu sira ba rejistu iha BTL, E.P Caicoli, Diresaun Operasional no Manutensaun nian.
“Maibé liu loron sanolu mak sira la ba rejistu iha BTL, tékniku sira sei tun ba dezliga ka hakotu sira nia koneksaun bee ne’e no sansaun mak sira tenke multa hahú hosi BTL monta metru kontadór ba sira-nia bee. Tanba ema sira ne’ebé halo ligasaun ilegál ne’e ita monta ona metru kontadór maibé halo fali ligasaun ilegál, maibé sira foun ita haruka selu no monta metru kontadór ho folin $55,” nia dehan.
Nia apela ba komunidade iha Dili ne’ebé daudaun ne’e menús bee-moos tanba kauza ema dada bee ilegál no tanba impaktu udan. Tanba ne’e, husu bele liga ba BTL,E.P hodi apoiu bee-moos ne’ebé ho folin barratu.
“Bee-moos ne’ebé ita apoiu ba komunidade urjente nian ita fó gratuita maibé situasaun normal ita faan ho folin barratu hanesan 5.000 litru $12,50. Atu hetan bee bele foti kupon iha Departamentu Apoiu Kliente nian mak bele responde,” nia dehan.
Jornalista : Arminda Fonseca
Editora : Armandina Moniz
