DILI, 01 Juñu 2026 (TATOLI)—Diretora Nasionál Transporte Terrestre, Maria Antónia Victór da Costa, hateten DNTT nafatin koordena ho Unidade Polísia Tránzitu (UPT) hodi halo kontrolu ba motorista sira-ne’ebé viola regra orden administrativu kódigu estrada.
Nia hatutan, bainhira transporte públiku sira la halo tuir regra ne’ebé iha mak DNTTT nafatin koordena no Polísia Tránzitu hodi halo monitorizasaun ba asuntu ida-ne’e, tanba daudaun ne’e iha motorista barak mak viola regra.
“Motorista sira-ne’ebé nafatin viola regra orden administrativu kódigu estrada ne’e, ami aplika multa ba sira hodi selu $45,” Diretora DNTT ne’e informa ba jornalista sira iha salaun Multi Usos GMN, ohin.
DNTT hamutuk ho PNTL mós sempre halo kontrolu ba motorista sira-ne’ebé para viatura iha estrada protokolu hahú husi rotunda Nicolau Lobato to’o Ponte BJ Habibie, ne’ebé kontra mós regra minitu lima (5) para iha fatin públiku sira-ne’e.
Nia hateten, daudaun ne’e infrasaun sira-ne’ebé DNTT rejista ne’e konsege ona rekolla reseita hahú husi Janeiru to’o Abríl hamutuk $10.596,00.
Jornalista : Alexandra da Costa
Editór : Cancio Ximenes
