DILI, (TATOLI) – Operasaun konjunta entre Autoridade Inspesaun no Fiskalizasaun Atividade Ekonómika no Sanitária (AIFAESA) no Polísia Nasionál Timor-Leste (PNTL) munisípiu Dili apreende (foti) sigarru ilísitu (ilegál) ne’ebé kontinua fa’an iha loja xina sira.
Apreensaun ba sigarru sira ne’e iha estabelesimentu Xina nian iha Kampung Baru ne’ebé maka negosiante sira ne’e balun subar iha gaveta, armazein no mákina fase roupa nian iha hariis-fatin laran.
Operasaun konjunta ne’ebé loloos atu halo apreensaun ba fogete sira ne’ebé tuir lei bandu atu fa’an, maibé lakonsege hetan produtu ne’e no deteta fali xinés balun fa’an sigarru ne’ebé proibe fa’an iha país ne’e.
Diretór Operasaun AIFAESA, Gabriel da Costa, hatete sigarru sira ne’e Governu bandu ona atu labele fa’an, maibé negosiante balun kontinua fa’an no tabaku ne’ebé apreende ne’e ho marka L.A ho L.A stiker mutin no mean, Marllboro mean no mutin nomós Surya.
“Ita haree rasik sigarru ne’ebé fa’an iha loja sira ne’e ita deteta iha loja haat iha área Kampung Baru nian, loja na’in liuliu xinés sira ne’ebé fa’an, ita husu ba sira dehan laiha, maibé realidade sira rai duni iha gaveta no sigarru sira ne’e iha kuantidade barak tebes”, Gabriel informa iha Kampung Baru ohin hafoin halo inspesaun hamutuk ho PNTL.
“Balun ta’uk, ami tama tiha loja ida no sasán sira ne’e sira (loja seluk) tau tiha hariis-fatin laran, subar tiha iha mákina laran. Fatin ita tama ne’e loja na’in ladún koopera ho ita no ita hein to’o nia laloke armazein, maibé to’o ikus nia konsege loke duni no hetan sigarru ne’ebé maka rai iha laran hodi nune’e ita prosesu tuir lei ne’ebé vigora iha ita-nia rai”, katak.
Tanba loja na’in sira ne’e komete infrasaun liuliu ba sigarru ilísitu ne’e sei presesa tuir dekretu lei 14/2016 no aplika multa tuir lei hatete ki’ik liu mak $100 no boot $5000.
Produtu apreensaun sira ne’e lori ona bá AIFAESA no sei halo destruisaun no kuantidade sigarru ne’ebé ohin foti ne’e iha slop hamutuk 228, masu 37 iha estabelesimentu haat no entre sira ne’e loja Tan Xiang San mak hetan tabaku ilísitu barak liu.
Jornalista: Maria Auxiliadora
Editora: Rita Almeida
