MALIANA, 04 abríl 2023 (TATOLI) – Diretór Komisaun Nasionál Eleisaun (CNE, sigla portugés), munisípiu Bobonaro, Juvito Ramos, husu afilante sira-ne’ebé deside afilia ba partidu seluk iha períodu konsolidasaun labele hasai fali linguajen ne’ebé ladi’ak hodi insulta partidu anteriór, tanba linguajen hirak-ne’e la merese atu eduka povu.
Notísia relevante: CNE Bobonaro identifika ona fatin kampaña eleitorál
“Ha’u hanoin lei garante liberdade ba ema hotu atu eskolla partidu ida, konforme nia hakarak, maibé militante, apoiante partidu polítiku sira, karik afilia ba partidu seluk favór ida labele ba hatete aat fali partidu ida-ne’ebé uluk hamahan-aan ba ne’e,” nia fó hanoin ne’e iha Soso, Maliana, tersa ne’e.
Juvito Ramos fundamenta, iha períodu konsolidasaun ne’e mós militante partidu polítiku sira labele utiliza atributu partidu ‘pawai’ ka movimenta ba mai ho motorizada, karreta iha fatin públiku, tanba seidauk tama kampana eleitorál.
Responsável CNE munisípiu Bobonaro hato’o mensajen ne’e atu nune’e iha períodu kampaña eleitorál durante loron 30, hahú iha loron 19 fulan-abríl ne’e bele minimiza provoka malu no problema hodi garante atividade la’o ho susesu.
“Agora daudaun ita akompaña iha mídia situasaun polítiku ne’e komesa manas, tanba iha afiliasaun hosi partidu ida ba partidu seluk, situasaun ne’e mak ita haree hanesan atu provoka tensaun polítika sa’e maka’as, ne’e dalaruma ita dehan bele afeta mós ba iha prosesu kampaña eleitorál bele iha problema, ne’e tuir ami-nia observasaun, ita espera buat ne’e labele akontese,” nia katak.
Daudaun ne’e Ofisiál Supervizaun Eleitorál (OSE) hamutuk 170 preparadu ona atu halo supervizaun atividade kampaña iha territóriu munisípiu Bobonaro.
“Ha’u husu ba ita hotu-hotu atu mantein nafatin disiplina no kumpre nafatin regra kampaña eleitorál, nune’e bele kria pás no establidade iha idak-idak nia suku no aldeia atu nune’e ita-nia prosesu kampaña eleitorál ne’e bele la’o ho hakmatek,” nia akresenta.
Nia fó-sai katak, daudaun ne’e ekipa sira halo hela edukasaun sívika hodi instrodús no lei no regra eleisaun nia ba eleitór sira, liuliu estudante sira tanba konsidera nu’udar eleitór foun.
Enkuantu objetivu realiza edukasaun sívika ne’e atu hasa’e taxa partisipasaun eleisaun lejizlativa tinan ne’e, maibé atividade ne’e labele kobre eskola hotu tanba kestaun limitasaun orsamentu.
Maibé atividade ne’e realiza ona iha Eskola Sekundária Katólika Palaka, Tékniku Vokasionál Batugade, Sekundária Jerál Paralelu Dom Martinho da Costa Lopes Balibo, Sekundária Jerál númeru Dom Martinho da Costa Lopes Maliana, Tékniku Vokasionál númeru II Malibaca, Yamato, Maliana.
Nune’e mós eskola Cristál, Téknika Imformatika (IT) Maliana, Ensiku Sekundária Tékniku Vokasionál Dom Bosco Mau-Mali, tuir planu sei realiza iha Eskola Tékniku Agríkola Mole-Anan no merkadu suku Karabau
Notísia relevante: CNE husu ofisiál supervizaun eleitorál 170 iha Bobonaro garante independénsia iha eleisaun
Jornalista : Sérgio da Cruz
Editór : Evaristo Soares Martins
