BOBONARU, 07 Maiu 2026 (TATOLI)-Komunidade iha suku Maleubu, postu administrativu Balibó, munisípiu Bobonaru, organiza malu hodi hadi’ak estrada liga husi Maleubu bá suku Lasaun, postu Atsabe, munisípiu Ermera, ho totál distánsia kilómetru rua-resin.
Xefe Suku Maleubu, Quintiliano Barros, dehan komunidade halo serbisu ho voluntariu atu fasilita movimentasaun ba atividade ekonómiku, kulturál, no atividade seluk iha suku rua ne’e.
Notísia relevante: IGEADI sei la halo normalizasaun estrada kotu iha Maleubu
“Komunidade hela iha ne’ebá ne’e maioria halo negosiu, fa’an tais, karau, no nesesidade bázika. Entaun sira hola inisiativa hodi aterru estrada ne’e, tanba kondisaun aat liu. Tempu udan labele utiliza no sira laiha forsa atu aterru, maibé iha bailoro tama ba fulan-Maiu sira ho inisiativa aterru estrada. Ida-ne’e husi diresaun suku Maleubu bá Lasaun, besik liu duké suku Maleubu bá Kolimau”, nia hateten iha Maliana, ohin.
Quintiliano fundamenta katak dalan ne’e hanesan alternativu ida liga entre postu administrativu Bobonaru no Atsabe.
“Ida-ne’e urjente, sira tenke hahú lalais agora tanba movimentu husi suku Kolimau ne’e la di’ak ona, ponte kotu to’o agora laiha intervensaun husi ministériu kompetente, liuliu IGEADI. Nunka tau prioridade ka atensaun to’o agora. Husi problema ida-ne’e mak inisia lalais para aterru, pelu menus sira-nia atividade halo negosíu fa’an sasán iha Lasaun ne’e bele liu ho di’ak. Dalan alternativa ida husi Maleubu bá Kolimau ne’e la kle’ur tan hadi’a ona ho orsamentu PNDS tinan ne’e”, nia dehan.
Quintiliano subliña katak serbisu komunitáriu ne’e nu’udar asaun ida atu kontribui ba dezenvolvimentu iha nivel lokál.
“Konsekuénsia mak ne’e, korajen nafatin hodi kontribui ba ita-nia rai, nune’e bele fasilita ita-nia nesesidade sira. Buat hotu ita hein desizaun husi nasionál, maibé prosesu iha leten mak hanesan ne’e ona. Esforsu hotu ami halo, maibé rezultadu mak ne’e”, dehan.
Notísia relevante: Estrada kotu semana rua ona iha Maleubu, Komunidade husu MOP rezolve ho lalais
Jornalista: Sergio da Cruz
Editora: Maria Auxiliadora
