BOBONARU, 13 Abríl 2026 (TATOLI)-Institutu Jestaun Ekipamentu Apoia Dezembolvimentu Infraestrutura (IGEADI) Brigada Maria-Tapo sei la halo normalizasaun ba estrada kotu iha suku Maleubu, Postu Administrativu Bobonaru, Munisípiu Bobonaru, tanba iha ona dalan alternativu ne’ebé dadaun ne’e komunidade sira asesu hela no estrada trosu ne’e tempu badak governu halo ona lansamentu.
Estrada referida kotu totál iha loron 28 fulan Marsu 2026 kauza hosi rai-monu hafoin akontese udan ho intensidade bo’ot.
Koordenadora IGEADI Brigada Maria-Tapo, Custodío Pereirra, konfirma dadaun ne’e komunidade sira asesu hela estrada alternativu liga husi suku Kolimau sai iha kruzamentu besik sede suku Maleubu.
Notísia Relevante:Estrada kotu semana rua ona iha Maleubu, Komunidade husu MOP rezolve ho lalais
“Ida ne’ebá ita la’os lak’oi normaliza, la’e, maibé dalan alternativu iha suku Kolimau mai dalan ne’e ema Cor tun mai tama to’o iha sede suku ne’e. Tanba ne’e mak ami la ba atende, se laiha alternativa ne’e ami bele atende,ne’e mós volume atu servisu ne’e halo iha uma leet rai naruk, tan ida ne’e mak la sala iha tinan 2021 ami ba mós labele halo buat ida. Tanba rai-naruk, labele mota ne’e klean tun, depo’is besik ema nia uma-los,” nia informa ba Jornalista sira, iha kna’ar-fatin Soso Maliana, Segunda ne’e.
Koordenadór ne’e haktuir to’o agora IGEADI seidauk simu pedidu husi lider komunitária sira no Autoridade postu konabá atu halo normalizasaun ba estrada kotu iha Maleubu.
“Ami hare iha medía mak fó sai, ami hatene, Administradór postu ho xefe suku ida la halo karta mai,” nia dehan.
Custodio konfirma alende estrada iha Maleubu, IGEADI mós sei la halo tan intervensaun ba estrada parte merkadu Asudai ne’e kontinua hetan estragus hosi dezastre naturál.
“Ida ne’e ami atende ona dala haat mós labele, rai-halai, agora sira tau de’it tian-listrik, mais ita atu halo-nusa. Se ida ne’e mak la di’ak los mak ami tun, maibé kabe ba Prezidente orienta ami ba, mais ami naran atu atende labele, tanba estrada ne’e ministru fo sai bebeik dehan kompaña sira fulan juñu ne’e mai hadi’a ona,” nia dehan.
Notísia Relevante:Komunidade husu MOP hadi’a estrada iha Asudai Bobonaru
Enkuantu estrada ne’e tama ona prioridade, no iha semana rua liubà, Ministru Planeamentu Estratejíku, Gastão Sousa, mós relata katak estrada trosu husi suku Lourba Postu Administrativu Bobonaru liga ba postu Administrativu Atsabe, Munisípiu Ermera tempu badak governu sei selebra kontratu ho empreza Shanghai Construction Group Co.Ltd ho valor orsamentu milaun $43,199,259.51 no distansia kilometru 48,93.
Jornalista : Sergio da Cruz
Editora : Armandina Moniz
