BONONARU,10 Abríl 2026 (TATOLI)— Komunidade preokupa ho estrada ligasaun husi postu Administrativu Bobonaru, Munisípiu Bobonaru ba Postu Administrativu Atsabe, Munisípiu Ermera kotu totál iha área suku Maleubu durante semana rua ona maibe governu liu husi Ministériu Obras Públika (MOP) seidauk rezolve hodi hadia.
Estrada referida kotu totál iha loron 28 fulan marsu liubá kauza hosi rai-halai hafoin akontese udan ho intensidade bo’ot.
Notísia Relevante:Estrada ligasaun Bobonaru-Ermera iha área Maleubu kotu totál
“Ami preokupa tanba to’o agora neim parte ruma mai hare,” Xefe Suku Maliubu, Quintiliano Barros, informa ba Tatoli, Sesta ne’e.
Ba Kestaun ne’e, Diretór Servisu Munisipál Obras Públika, Autoridade Munisípiu Bobonaru, Marcelino Godinho, dehan problema ne’e hato’o ona ba IGEADI nasionál no brigada Maria-Tapo atu halo intervensaun.
“Sira sei mobiliza makina ba Suku Lupal postu Lolotoe, karik sira nia kareta tronton mai mak bele mobiliza ba Bobonaru Kolimau, no data mak seidauk los tanba ha’u rekonfirma fali ho koordenador IGEADI Brigada Maria-Tapo no la atende telefoni,” nia realsa.
Antes ne’e Negosiante husi suku Tebabui,Olandino Alves, husu ba parte kompetente liu-liu Institutu Jestaun Ekipamentu Apoia Dezenvolvimentu Infraestrutura (IGEADI) atu halo normalizasaun imediata, tanba agora movimentasaun públiku paradu.
“Ami agora atu viajen ba mai mós araska, dalan kotu hanesan ne’e ami selu ema dudu-motor no Leba pasta, nomos ami buka meius tenke hanesan ne’e de’it ona,” nia dehan.
Komunidade suku Kolimau Feliz Franculino, afirma katak problema ne’e afeta ba aktividade oi-oin hanesan saúde liu-liu ekonomía iha baze.
Notísia Relevante:MOP oriente ekipa halo levantamentu dadus ba estrada Maleubu
“Kuandu estrada kotu hanesan ne’e ami nia movimentu la la’o. Tanba ne’e, ami husu governu atu tau-atensaun ba ponte ne’e,tanba ne’e hamate ona ami nia negosiu. Ami husi Kolimau atu ba Maliana presiza duni estrada, se kotu hela hanesan ne’e ami labele ba,” tenik Felis.
Sentimentu hanesan husi komunidade Suku Tebabui, Adelina de Nasimentu, hodi manifesta prekupasaun katak “Ami mai faan sasan motór ami Ojek de’it mós ba mai selu $10. Agora ponte kotu tia ne’e ami nia negosiu araska. Nusa mak la mai ajuda ami povu sira atu halo negosiu ba mai hodi suporta ba ami nia-oan sira eskola, han-hemu iha ami nia familia,ne’ebé bo’ot sira tenke mai hare ami nia estrada hodi hadia,” Adelina husu.
Enkuantu tuir informasaun ne’ebé Tatoli asesu estrada referida iha tinan hirak liuba kotu no IGEADI konsege halo normalizasaun.
Estrada ne’e tama ona prioridade, no iha fulan kotuk Ministru Planeamentu Estratejíku, Gastão Sousa, mós relata katak estrada trosu husi suku Lourba Postu Administrativu Bobonaru liga ba postu Administrativu Atsabe, Munisípiu Ermera tempu badak governu sei selebra kontratu ho empreza Shanghai Construction Group Co.Ltd ho valor orsamentu milaun $43,199,259.51 no distansia kilometru 48,93.
Jornalista : Sergio da Cruz
Editora : Armandina Moniz
