BOBONARU, 29 Marsu 2026 (TATOLI)—Estrada ligasaun husi Suku Maleubu ba Suku Kolimau, Postu Administrativu Bobonaru, Munisípiu Bobonaru inklui postu Administrativu Atsabe, Munisípiu Ermera kotu totál iha área Maleubu tanba kauza husi mota-boot hafoin akontese udan iha sábadu (28 Marsu 2026) ne’e.
Xefe suku Maleubu, Quintiliano Barros, preokupa tanba estradane’e kada tinan sempre kotu no komunidade bele hadi’ak rasik, maibé ho akontesimentu dezástre naturál horisehik ne’e halo komunidade labele halo intervensaun ho servisu manuál tanba estraga grave tebes.
Notísia Relevante: Estrada Kailaku-Lolotoe iha faze aprovizionamentu finál, Lourba-Atsabe hein implementasaun
“Situasaun agora dalan kotu totál, movimentu ema la’o-ain de’it mós liu la di’ak tanba bee-bomba ba naruk loos ne’e. Uluk ne’e ponte monu tiha maibé ita sei bele hada hodi bele liu ,agora ne’e ema hada ho liman labele tanba kee naruk tun. Depo’is husi parte sorin fali, rai-monu husi leten mak taka nakonu. Atu liu husi leten rai taka nakonu, atu liu husi kraik rai kee naruk tiha, ne’e ita hada ho liman labele,” Nia informa ba Agência TATOLI liuhusi telefónika, ohin.
Hafoin akontesimentu ne’e, kestaun ne’e xefe suku Quintiliano hato’o ona ba Autoridade Munisípiu Bobonaru atu submete ba parte kompetente maibé to’o agora seidauk iha resposta.
Nia dehan, problema Estrada kotu ne’e afeta maka’as ba atividade ekonomía, saúde no seluk tan, tanba susar mós atu asesu ba dalan alterntivu.
“Estrada ne’e tama ona prioridade atu rezolve iha tempu badak, maibè ne’e presiza IGEADI halo normalizasaun. Se lae, komunidade hotu-hotu lori señora, liis, koto sira-ne’e ba Maliana, dalaruma sira husi Karabau ne’e baibain lori sasán ba faan iha Atsabe no Lasaun, depo’is movimentu transporte hanesan Anguna, Bus ne’e paradu total. Ba setór saúde mós araska no susar atu halo transportasaun ba fatin salvasaun, tanba ita liu la di’ak,” nia dehan.
Enkuantu, tuir polítika Governu Konstitusionál da-sia (IX) katak estrada ne’e tama ona prioridade no iha semana rua liubà, Ministru Planeamentu Estratejíku, Gastão Sousa, mós relata katak estrada trosu husi Suku Lourba, Postu Administrativu Bobonaru liga ba Postu Administrativu Atsabe, Munisípiu Ermera, iha tempu badak Governu sei selebra kontratu ho empreza Shanghai Construction Group Co. Ltd, ho valor orsamentu $43,199,259.51 no distánsia kilometru 48,93.
Notísia Relevante: DSMOP submete pedidu normalizasaun estrada iha Malilait-Lourba
Jornalista : Sergio da Cruz
Editora : Cancio Ximenes
