BOBONARU, 13 Marsu 2026 (TATOLI) – Reabilitasaun estrada urbana trosu Mau-Mali bá Kailaku ho distánsia kilómetru 26 no trosu suku Oe-leu bá postu administrativu Lolotoe, munisípiu Bobonaru, ho kilómetru 8,9 tama ona iha prosesu aprovizionamentu finál no iha tempu badak sei anunsia empreza manan-na’in.
Ministru Planeamentu no Investimentu Estratéjiku, Gastão de Sousa, hateten informasaun ida-ne’e hodi responde ba prekupasaun povu iha ámbitu vizita Primeiru-Ministru, Xanana Gusmão, bá Bobonaru atu haree besik kondisaun mínima ba sira ba implementasaun podér lokál.
Governante mós adianta katak estrada trosu suku Lourba, postu administrativu Bobonaru, liga bá postu Atsabe, munisípiu Ermera, iha tempu badak Governu sei selebra kontratu ho empreza Shanghai Construction Group Co.Ltd., ho valór orsamentu hamutuk $43.199.259,51, atu reabilita estrada ho distánsia kilómetru (km) 48,93.
Notísia relevante: CAFI sei aprova estrada urbana Maliana ho kilómetru 23
“Kailaku mai Maliana iha faze finál aprovizionamentu. Iha tempu badak sei hatene manán-nain ne’ebé atu kaer estrada ida-ne’e. Trosu husi Oe-leu bá Lolotoe mós iha faze finál aprovizionametu, ne’ebé manán-na’in iha tempu badak ita bele hatene”, nia hateten iha Zinájiu Maliana.
Governante ne’e akresenta mós katak ba estrada trosu-Letefoho-Atsabe-Lourba, empreza manán-na’in iha tiha ona no iha tempu badak sei asina kontratu antes hahú implementasaun obra.
Kona-ba estrada trosu kapitál Maliana liga bá postu administrativu Bobonaru, Gastão informa katak daudaun iha hela faze lavantamentu dadus tékniku, hanesan mós estrada trosu Lourba liga bá Lepo, postu administrativu Zumalai, munisípiu Kovalima.
“Maliana bá Bobonaru kuandu [levantamentu dadus] hotu sei lori bá aprezenta iha Konsellu Administrasaun Fundu Infraestrutura atu prosesu. Agora, Lourba bá Lepo mós hanesan, ita hein tan lai uitoan, tenke pasiénsia tanba ita-boot sira iha pakote rua. Tempu badak obra sei hahú”, esplika.
Rezidente Maliana, Filomena Pires, husu ba Governu atu aselera prosesu reabilitasaun estrada Maliana-Bobonaru, tanba kondisaun atuál grave no difikulta movimentu povu, liuliu iha tempu udan.
Prezidente Klibur Munisípiu Bobonaru, Eusébio Guterres, mós rekomenda ba Governu atu aselera prosesu reabilitasun estrada trosu Lourba bá Lepo.”Ita-nia petróleu no gás Bloku B atu halo ona esplorasaun. Bloku B ne’e iha suku Sibuni, tanba ne’e favor tau-matan ba dalan ne’e”, nia hato’o.
Tuir dadus husi Autoridade Munisípiu Bobonaru, estrada nasionál identifikadu hamutuk kilómetru 188,23. Husi totál ida-ne’e reabilita ona kilómetru 60,212, ongoing ka iha prosesu 26,70km no seidauk realiza kilómetru 101,31.
Estrada munisipál ho totál distánsia kilómetru 85,497, husi ne’e ongoing kilómetru 3,72 no seidauk realiza 81,78km. Ba estrada urbana iha kilómetru 75,95, realiza na 65,45km no seidauk realiza 10,50km. Enkuantu estrada rurál hamutuk 468km, realiza ona 136km, ongoing 27km no seidauk realiza 304,15km.
Husi kategoria estrada sira ne’e hotu, realiza ona 626,102km, ongoing 57,42km no seidauk realiza 498,15km.
Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
Jornalista: Sergio da Cruz
Editora: Maria Auxiliadora
