BOBONARO, EKONOMIA, HEADLINE, MUNISÍPIU

CAFI sei aprova estrada urbana Maliana ho kilómetru 23

CAFI sei aprova estrada urbana Maliana ho kilómetru 23

Vise-Primeiru-Ministru no Ministru ba Planu no Ordenamentu, José Maria dos Reis. Imajen TATOLI/Egas Cristóvão

BOBONARO, 15 jullu 2022 (TATOLI) – Konsellu Administrasaun Fundu Infraestrutura (CAFI, sigla portugés) sei aprova estrada urbana Maliana ho kilómetru 23.

Vise Primeiru Ministru, Ministru Planu no Ordenamentu, José Maria dos Reis, fó-sai katak semana oin governu aprezenta ona konstrusaun estrada urbana kapitál Maliana, munisípiu Bobonaro ho totál kilómetru 23 ba Konselu Administrasaun Fundu Infraestrutura atu hetan aprovasaun.

Governante ne’e hato’o asuntu ne’e hodi hatán ba prekupasaun povu nian ne’ebé aprezenta hosi Xefe suku Lahomea, postu administratrivu Maliana, munisípiu Bobonaro, Cirilo Mau-Leto, iha atividade konsulta públika kona-bá planu munisipál ordenamentu territóriu ne’ebé realiza iha Jináziu Maliana, sesta ne’e.

Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe

Kondisaun estrada refere durante ne’e sai preokupasaun ba komunidade Maliana, maibé nia  klarifika prosesu hotu Ministériu Obra Públika (MOP) foin iha loron (01/06) ne’e mak submete ba  iha Ajénsia Dezenvolvimentu Nasionál (ADN) halo ona verifikasaun.

“Tuir loloos atu ajenda iha semana kotuk CAFI atu aprova, maibé seidauk entaun semana oin mak atu lori ba KAFI aprova, bainhira aprova tiha ona, maka ami sei lori ba Komisaun Nasionál Aprovizionamentu (CNA, sigla portugés) atu tama ba iha prosesu konkursu ba iha estrada ne’e,” nia hateten iha intervensaun.

Ezekutivu ne’e fó-sai katak, totál orsamentu ne’ebé gasta ba konstrusaun ne’e iha faze rua, faze primeiru sei gasta millaun $16 no faze daruak sei gasta millaun $23.

Xefe suku Lahomea, postu administrativu Maliana, munisípiu Bobonaro, Cirilo Mau-Leto, reprezenta povu husu ba VIII Governu Konstitusionál atu realiza promesa ne’e nune’e bele implementasaun konstrusaun iha tempu badak.

Nia argumenta, Maliana hanesan kapitál munisípiu Bobonaro, ne’ebé sai fatin sentru ba povu sira hosi halo atvidade ekonómiku no seluk tan atubele hadi’a moris, maibe kondisaun estrada mak difikulta movimentasaun komunidade.

Xefe suku Lahomea ne’e ko’alia ona ho Ministru Obra Públika sesante, Salavdor Pirez, iha tinan 2021 maibé to’o agora estrada refere iha tempu udan kontinua sai difíkuldade ba komunidade.

Munisípiu Bobonaro iha suku 50 no postu administartivu neen, komposta hosi Atabae, Balibo, Cailaco, Maliana, Bobonaro no Lolotoe, ho totál populasaun 97,762, komposta hosi mane 48,875 no feto 48,887 ho totál uma-kain 17,675.

Notísia relevante:Estrada ligasaun Lolotoe-Maliana aat

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!