BOBONARU,07 Abríl 2026 (TATOLI)— Komunidade sira husu ba Ministériu Obra Públika (MOP) atu buka meius hadi’a estrada iha área Asudai, suku Malilait, Postu Administrativu Bobonaru, Munisípiu Bobonaru ne’ebé kontinua hetan estragus grave kauza husi rai-halai hafoin akontese udan-bo’ot durante ne’e.
Estrada refere liga mós ba Postu Administrativu Atsabe, Munisípiu Ermera no Postu Administrativu Zumali, Munisípiu Kovalima.
Komunidade Agrefina de Jesus, dehan kondisaun atuál estrada ne’e hela de’it espasu ba motorizada enkuantu ba transporte roda haat-labele ona asesu tanba rai kontinua monu.
Notísia Relevante:Komunidade solisita ba MOP aselera reabilitasaun estrada Maliana bá Bobonaru
“Agora hela de’it metru ida hanesan nee no hein kotu totál ona. No, semana kotuk ne’e mak komunidade sira ba kee besi-rin eletrisidade nia hulan mai, tau iha ne’e no provizoriu ateru tan para kareta liu. Mais udan loron rua tutuir malu ne’e, rai sira nia monu hotu ba kraik, depo’is besi sira monta ne’e mos, balu kleuk mamar ona no kareta liu ladiak ona,” nia dehan ba Tatoli iha terrenu, Tersa ne’e.
Nia husu atu Governu presiza halo intervensaun emerjensía tanba problema ne’e afeta ba aktividade ekonomia, saúde no seluk tan.
“Agora sira ida faan produtu lokál ne’e atu lori ba merkadu mós la di’ak, sasan sira lori husi Maliana atu ba parte suku hira iha sorin ne’e mós araska, ema moras ka atu partus, pasiensia transfer de’it ona tanba Ambulansia liu la di’ak. Ida ne’e mak ami povu iha ne’e preukupa teb-tebes,” katak Agrefina.
Notísia Relevante:IGEADI normaliza estrada iha Asudai-Malilait
Alende ne’e, motorista Kamioneta, Florindo Barros, haktuir antes ne’e IGEADI halo ona normalizasaun ba estrada ne’e, maibé labele solusiona tanba estrutura rai-mamar.
“Agora mai atu hadi’a karik, tenke hare didi’ak, tau besi ka kontainer ruma para bele metin. Se ateru rai mak ba de’it, ne’e udan mai sobu fali, estrada nafatin kotu ami liu la di’ak,” nia dehan.
Ba Kestaun ne’e, Koordenador Infraestrutura destakadu MOP, Munisípiu Bobonaru, Fernando de Fatima, konfirma iha tempu badak IGEADI sei halo atendimentu emerjensia.
“ Ita nia estrada trosu Lourba ba Atsabe ne’e prosesu iha nasionál ona,” Fernando relata.
Enkuantu estrada ne’e tama ona prioridade, no iha fulan kotuk, Ministru Planeamentu Estratejíku, Gastão Sousa, mós relata katak estrada trosu husi suku Lourba Postu Administrativu Bobonaru liga ba postu Administrativu Atsabe, Munisípiu Ermera tempu badak governu sei selebra kontratu ho empreza Shanghai Construction Group Co.Ltd ho valor orsamentu milaun $43,199,259.51 no distansia kilometru 48,93.
Jornalista : Sergio da Cruz
Editora : Armandina Moniz
