BOBONARU, 15 Dezembru 2025 (TATOLI) – Institutu Jestaun Ekipamentu no Apoiu Dezenvolvimentu Infraestrutura (IGEADI) nia brigada Maria Tapó halo ona normalizasaun ba estrada besik área mini merkadu Asudai, ne’ebé lokaliza iha aldeia Taimea, suku Malilait, postu administrativu Bobonaru, munisípiu Bobonaru, ne’ebé hetan estragu hafoin akontese udan boot iha semana kotuk.
Komunidade Joana de Jesus Lopes konsidera intervensaun IGEADI ne’e bele fasilita ona movimentu públiku, liuliu iha tempu udan.
Notísia Relevante:Estrada ligasaun Bobonaru-Zumalai no Atsabe ameasada kotu
“Sira aterru, fakar tan fatuk be metin ona. Depois ke’e tan bee dalan, udan mós la ameasa ona. Foin lalais ne’e ami liu bá-mai ta’uk, tanba rai halai iha kraik ne’e mamar tiha. Agora, maski sei tahu maibé kareta liu di’ak ona, ami bele viajen bá-mai lori produtu lokál asesu bá merkadu inklui atividade seluk”, nia dehan ohin.
Motorista Norberto de Araújo agradese ba intervensaun ne’e no hein katak iha tempu badak Governu sei implementa projetu konstrusaun ba estrada ne’e.
“Hadi’a ne’e tinan-tinan, maibé udan mai aat filafali. Ami presiza mak asphalt para liu bá-mai ho di’ak, tanba estrada ne’e tinan barak ona aat”, nia salienta.
Tuir observasaun jornalista Tatoli iha terrenu, ekipamentu pezadu IGEADI hasai mós sedimentasaun ne’ebé nakonu iha valeta laran.
Estrada ne’e liga postu administrativu Atsabe, munisípiu Ermera no post Zumalai, Mmunisípiu Kovalima.
Notísia relevante: DSMOP submete pedidu normalizasaun estrada iha Malilait-Lourba
Jornalista: Sergio da Cruz
Editora: Maria Auxiliadora
