VIQUEQUE, 22 abríl 2023 (TATOLI)–Prezidente Partidu Unidade Dezenvolvimentu Demokrátiku (PUDD), Silvester Xavier Sufa, kompromete sei tau prioridade ba área peska bainhira povu fó fiar hodi ukun.
“Timor-Leste ninia riku-soin boot ida maka tasi. Tanba ne’e bainhira povu fó fiar, hakarak tau prioridade ba setór peska no kapasita joven sira oinsá kaer ikan atu nune’e ita labele dependénsia ikan hosi nasaun seluk,” Silvester Xavier Sufa hateten durante kampaña aberta iha kampu futeból iha postu Viqueque Villa, sábadu ne’e.
Notísia relevante : PUDD sei hadi’a sistema edukasaun inklui halakon sistema familiarizmu asesu bolsa estudu
Tanba ne’e, nia husu ba Viqueque-oan sira atu fó apoiu ba partidu ne’e hodi bele realiza programa sira.
“Ha’u husu ba Viqueque-oan sira tenke luta maka’as ba ita-nia dignidade. PUDD mai ho ninia programa oin-oin ne’ebé sei refleta ba povu nia moris,” nia akresenta.
Nia dehan, bainhira PUDD tama Parlamentu Nasionál (PN), sei defende programa di’ak ba joven no inan aman sira.
Aleinde ne’e, sei fó atensaun ba defeza no seguransa marítima hodi sosa ró no elikópteru hodi halo kontrola riku-soin tasi.
“Tanba riku-soin tasi sei fó reseita di’ak ba Estadu no bein estar povu,” nia hato’o.
PUDD mós hakarak fasilita abitante sira hodi asesu ba kréditu hodi hala’o atividade negósiu no fó subsídiu.
Atividade kampaña aberta ne’e hahú hosi tuku 14:00 to’o 16:00, ne’ebé hetan partisipasaun hosi militante no simpatizante PUDD hosi postu Lacluta, Viqueque Villa, Uatulari, Ossu no Uatucarbau.
Hetan mós seguransa hosi Polísia Nasionál Timor Leste (PNTL) munisípiu Viqueque no akompañamentu hosi Komisaun Nasionál Eleisaun (CNE, sigla portugés) inklui observadór nasionál no internasionál.
Jornalista : Vitorino Lopes da Costa
Editora : Julia Chatarina
