DILI, 21 maiu 2023 ( TATOLI)- Reitór Universidade Nasionál Timor Loro Sa’e (UNTL), João Soares Martins, hateten UNTL hakarak governasaun foun ne,ebé sei mai, tenke iha lejitimasaun husi povu.
“UNTL nia prespetiva ba eleisaun parlamentár tinan ida ne,e tenke tuir normas demokrásia bazea ba konstitusionál katak eleitór sira tenke livre exerse sira-nia votus sekretu ho nune’e bele fó lijitimasaun ba partidu vensedór hodi ukun povu tomak iha Timor – Leste,” Hateten Reitór UNTL, João Soares Martins, ba TATOLI iha Sentru Votasaun Eskola 30 de Agusto, Comoro Dili iha domingo ne,e.
Nia reafirma, ohin loron povu hotu antuziasmu hodi mai exerse sira-nia deiritu votu ho espetativa katak, partidu ida ne,ebé mak manan tenke ukun povu ho di’ak hodi halo dezenvolvimentu nasionál ba tinan lima oin mai.
“Eleisaun parlamentár ida ne,e tuir observasaun UNTL la’o di’ak tebes, povu antuziasmu ba vota tuir sira-nia konsénsia rasik, espera kata povu nia direitu votu sei fó lijitimasaun ba partidu sira hodi ukun Timor – Leste ho krédibel ho nu,ne bele hadi’a dezenvolvimentu nasionál inklui hadi’a povu nia moris iha tinan lima oin mai,” nia dehan.
Reitór UNTL, João Soares Martins, afirma, UNTL prontu kolabora ho governasaun foun ne,ebé sei mai, hodi fó kontribusaun iha área oioin mak hanesan: setór edukaaaun, governasuan di’ak, saúde, agrikultura no setór selu seluk, hodi dezenvolve Timor – Leste nia prosesu dezenvolvimentu nasionál no hadi’a povu nia moris di’ak iha Timor – Leste.
Iha fatin hanesan Reprezentate eleitór, Duarte dos Santos hateten eleisaun parlamentár ida ne,e importante tanba liuhosi eleisaun povu bele exerse sira-nia direitu votu nu’udar sidadaun Timor – Leste ho espetativa katak, partidu ida ne,ebé maka manan tenke akumula povu hotu hodi halo dezenvolvimentu iha tinan lima oin mai.
“Espetativa eleitór nian mak ba partidu ida ne,ebé mak manan simboliza povu mak manan, ho nune’e iha lejitimasaun hodi akumula povu tomak ba interese nasionál hodi hadi’a povu nia moris iha tinan lima oin mai,” Nia dehan.
Iha oportunidade ida ne,e representate eleitór Duarte dos Santos, husu ba partidu polítiku hotu ne,ebé sei hetan lijitimidade hosi povu ba ukun, tenke realiza promesa sira ne,ebé antes ne,e promote ona ba povu liuhosi kampaña polítika iha Timor – Leste.
Jornalista: Camilio de Sousa
Editora: Nelia Borges
