VIQUEQUE, 06 juñu 2023 (TATOLI)–Abitante hosi suku Loihuno, postu administrativu Ossu, munisípiu Viqueque ne’ebé kehe rai atu harii torre operadór telekomunikasaun Telemor, hetan restu mortál ida área Atelita, aldeia Samaliu.
Veteranu suku Luihuno, Cândido Henrique ‘Dai-Uari’, haktuir, empreza Telemor halo kontratu ho abitante sira atu kehe fatin ba torre iha loron 02 juñu 2023, nune’e hetan mate-ruin.
“Iha sinál fiu ida iha liman mate-ruin ne’ebé uluk militár Indonézia sira kesi, enkuantu mate-ruin kompletu hela. Nune’e ohin ami halibur hamutuk ho família sira ne’ebé uluk militár Indonézia sira oho lakon, liu-liu ami-nia maun alin saudozu Gilberto hosi suku Uagia, postu Ossu. Deskonfia ba ida-ne’e, ami bolu hotu família hosi saudozu Gilberto, ninia alin Aquilis hasai ninia ra’an hodi teste ho tradisionál, maibé la’ós. Tanba ne’e, ami husu ba família sira ne’ebé sente ninia família lakon karik ba uma-mahon Uatumali Abana ne’ebá,” Cândido Henrique informa ba Agência Tatoli iha suku Loihuno, tersa ne’e.
Notísia relevante : Governu haloot ona restu mortál 2.000-resin iha territóriu nasionál
Veteranu ne’e haktuir, iha tinan 1980, militár Indonézia tau abitante sira hosi foho Matebian no Bibileo iha postu hosi Batallaun Kotis sira-nia fatin iha área Atelita, bainhira abitante sira mai iha vila to’o fali funu ramata militár sira fila bá sira-nia rain.
“Tanba ne’e maka ami deskonfia katak ida-ne’e militár Indonézia sira oho hodi tau hela iha fatin Atelita ida-ne’e. Komisaun rekolla restu mortál postu Ossu agora lori ona ba uma-mahon iha Abana,” nia akresenta.
Iha fatin hanesan, Rereprezentante Konsellu Veteranu munisípiu Viqueque, Daniel Sarmento ‘Fogeti’, dehan parte Konsellu halo ona koordenasaun ho nasionál ne’ebé hato’o pedidu ba Ministériu Asuntu Veteranu hodi haruka ona ambulánsia, kaixaun no bandeira hodi lori restu mortál bá uma-mahon, hafoin ekipa forense mai halo teste ba mate-ruin no identifika loloos.
“Parte kultura maka ohin ami hamutuk ho autoridade sira lori ba uma-mahon. Ha’u husu ba populasaun hotu iha munisípiu Viqueque, karik iha família ruma lakon iha tempu funu karik mai haree hodi koko tradisionál. Kona-ba mate-ruin ida-ne’e ita labele hakoi uluk, Prezidente Repúblika dekreta lai hafoin ita ba haloot iha jardín eroi, provizóriu ami tau iha uma-mahon hodi halo identifikasaun,” nia esplika.
Iha biban hanesan, Traballadór empreza Telemor, Agostinho da Costa, haktuir, traballadór sira kehe rai ba torre maka hetan, nune’e informa kedas ba veteranu sira hodi bá haree restu-mortál.
“Ami na’in-haat maka kehe torre Telemor nian maibé bainhira ami kehe, hetan mate-ruin ida, nune’e ami ba fó hatene ba veteranu Dai-Uari hodi mai haree,”nia konta tuir.
Nune’e, Konsellu Veteranu munisípiu Viqueque hamutuk FALINTIL-Forsa Defeza Timor Leste (F-FDTL) hamutuk ho autoridade no abitante lokál haloot restu mortál ne’e iha uma-mahon Uatumali Abana iha suku Nahareka, postu Ossu, munisípiu Viqueque
Jornalista : Vitorino Lopes da Costa
Editora : Julia Chatarina
