DILI, 20 setembru 2023 (TATOLI)—Koordenador Plataforma Nasionál Bee Saneamentu no Ijéne iha Timor-Leste, Januario Amaral, husu Komisaun E trata asuntu Infraestrutura iha Parlamentu Nasionál (PN) atu konsidera alokasaun iha Orsamentu Jerál Estadu (OJE) 2024 integra asuntu bee-moos no saneamentu.
“Ohin, audiénsia ho komisaun E foka liu ita plataforma nasionál bee no saneamentu ninia observasaun deskobrimentu dezenvolvimentu bee no saneamentu iha Timor-Leste, hodi hato’o ba Deputadu sira iha komisaun E atu haree setór ne’e liuliu iha prosesu elaborasaun Orsamentu Jerál Estadu (OJE) 2024, bele integra asuntu bee no saneamentu iha alokasaun OJE ne’e,” Koordenadór ne’e hateten ba jornalista sira hafoin ramata halo audiénsia iha uma fukun PN, kuarta ne’e.
Durante audiénsia, Plataforma Nasionál Bee Saneamentu no Ijéne iha Timor-Leste, hato’o mós rezultadu auditória sosiál ne’ebé hala’o tinan kotuk kona-ba fornesimentu bee-moos iha munisípiu tolu iha área rurál hanesan Viqueque foku ba iha suku Umawainleten no Uma-Tolu, Aileu iha suku Saburia no Asumau, Ermera iha suku Goulolo ho Railaco, ne’ebé iha sistema problema boot.
Problema sira mka fornesimentu seidauk adekuadu no la asesivel ba ema ho defisiénsia, fornesimentu seidauk regulár bailoro rekursu bee la natoon. entaun komunidade susar asesu ba bee-moos entaun opsaun seluk mak sira ba kuru iha mota, no grupu maneza fasilidade la funsiona tanba grupu serbisu voluntáriu.
Iha parte seluk, durante ne’e mós Plataforma Nasionál ne’e halo mós advokásia OJE kada tinan ba bee no saneamentu, no polítika sira liga ho bee no saneamentu iha Timor-Leste, nune’e iha OJE tinan oin mai atu konsidera integra asuntu refere hodi solusiona.
Membru Plataforma Nasionál Bee Saneamentu no Ijéne iha Timor-Leste, Felisiano da Costa Araújo, hateten audiénsia ne’e bele husu komisaun tau konsiderasaun iha OJE mai no haree jestaun jere oinsá fornesimentu bee adekuadu duni ba komunidade.
Iha parte seluk, nia fó hanoin ba komunidade sira liuliu iha Dili atu labele halo ligasaun ilegál ba bee.
Jornalista : Nelson de Sousa
Editór : Cancio Ximenes
