DILI, 11 Juñu 2026 (TATOLI)-Xefe Bankada Partidu Libertasaun Populár (PLP), Maria Angelina Sarmento Lopes, la konkorda atu halo alterasaun ba Kódigu Penál hodi kriminaliza defamasaun, tanba ida-ne’e bele lori retrosesu ba demokrasia.
“La konkorda tanba lei ida-ne’e bele lori retrosesu ida ba ita-nia demokrasia. Tanba ita-nia Konstituisaun ko’alia liberdade espresaun, liberdade opiniaun no lei defamasaun ne’e hanesan tesi kotu tiha ema nia liberdade espresaun no liberdade opiniaun”, nia hateten iha Parlamentu Nasionál, ohin.
Deputada ne’e hateten katak ida iha rejime ditadura militár sira mak aplika kriminaliza defamasaun atu labele kritika membru Governu no entidade públika sira ne’ebé asume kargu públiku hodi jere osan públiku nian ba interese polítika sira.
“Entaun, se ita aplika lei ida-ne’e, ita rasik hakarak atu halakon tiha liafuan ida demokrasia no repúblika demokrátika”, dehan.
Tuir nia, demokrasia signifika husi povu ba povu no fila ba povu, katak ema ne’ebé asume kargu públiku povu iha déver tomak atu observa no akompaña fó opiniaun ho krítika kona-ba lala’ok ema ida asume kargu públiku.
“Agora, se ita kahur fali ema sira iha mídia sosiál, laiha respeita ba governante no líder sira, dalabarak sira ID falsa hodi tolok no insulta, ne’e iha lei seluk ida, labele kahur fali ho defamasaun”, katak.
Nia sujere atu haree ona Lei Krime Sibernétika hodi haree kestaun referida. Tanba nia dehan, bainhira ema ida ko’alia faktu no evidénsia laiha no tolok líder sira, hanoin ne’e iha Kódigu Penál rasik ne’ebé ko’alia ona kona-ba injúria ne’e krime ida. Tanba ne’e, idaidak ho nia porsaun no baze legál ne’ebé nia kontestu ne’e diferente.
Nia dehan demokrasia katak ema hotu iha direitu atu ko’alia no fó observasaun labele hanoin krítika ne’e ladi’ak.
“Ne’ebé ami rasik la konkorda atu lei ne’e avansa ba oin, no kontente liután se lori lei ne’e ba oin mak Prezidente Repúblika veta ne’e di’ak liután”, nia salienta.
Bankada mós sei haree posibilidade seluk husu ba tribunál halo fiskalizasaun abstrata ba konstitusionalidade.
Notísia relevante: Paulo Remédios: Kriminaliza difamasaun la fó impaktu ba liberdade imprensa
Jornalista: Nelson de Sousa
Editora: Maria Auxiliadora
