MALIANA, 28 setembru 2023 (TATOLI)-Sekretária Estadu Igualdade (SEI), Elvina de Sousa Carvalho, kinta ne’e halo enkontru ho feto potesiál munísipiu Bobonaro hodi enkoraja feto potensiál kompete iha eleisaun lideransa komunitária.
Enkontru ne’e realiza ho objetivu prinsipál atu hasa’e taxa partisipasaun feto iha eleisaun lideransa komunitária ba períodu 2023- 2030 inklui eleisaun sira tuir mai ba kámara munisipál nian.
Eis deputada ne’e enkoraja feto sira iha Bobonaro atu barani foti desizaun hodi konkorre iha eleisaun suku ne’ebé sei realiza iha loron 28 fulan outubru tinan 2023.
“Ita hakarak hasa’e taxa partisipasaun feto nia iha eleisaun suku, atu sai autoridade lokál, tanba prezensa feto sira iha nível foti desizaun, ita bele dehan reprezenta metade hosi populasaun, tanba sira foti desizaun iha konsellu suku, sira sukat ho versaun sira nian, alende hanesan inan, hanesan jestór iha uma-laran. Ezemplu komunidade presiza bee, nia tenke tau prioridade ba bee, tanba nia hatene atu te’in presiza bee,” Elvina hateten iha salaun administrasaun munisípál Bobonaro.
Atu hasa’e taxa partisipasaun, Elvina de Sousa hateten, papél importante ida hosi feto potensiál munisípiu Bobonaro, halo esforsu liuhosi fahe informasaun ba to’o área rurál sira nune’e feto sira mós bele pro-ativu no barani atu kompete ho mane sira, tanba lei fó dalan ba ema hotu-hotu atu partisipa iha eleisaun lideransa komunitária.
“Ita-boot sira iha papél importante, primeiru enkoraja maluk feto sira partisipa ativu, kandidata-an, segundu akompaña sira atubele tuir prosesu tomak, muda mentalidade hosi komunidade liuhosi programa sira-ne’ebé mak iha. Bobonaro mós iha barreira oituan, tanba suku balu hateten katak suku balu labele sai xefe suku,” Nia hateten.
Prezidente Feto Potensiál Munisípiu Bobonaro, Domingas dos Santos, informa, daudaun ne’e halo hela formasaun no kapasitasaun ba feto sira iha nível munísipiu to’o postu administrativu sira.
“Ami fó korajen sira, atu sira bele kandidata-an, tanba feto sai parseiru mane nian no esperiénsia ne’ebé hatudu durante ne’e tinan 20, feto bainhira kaer pozisaun iha foti desizaun, nia desizaun ne’e justu ba moris família ba moris sosiedade nian,” nia subliña.
Presizente Autoridade Munisípiu Bobonaro, Ernesto de Oliveira Barreto, husu ba komunidade sira atu fó oportunidade barak liu ba feto hodi hola parte iha eleisaun ne’e.
Alende ne’e husu mós ba lia-na’in sira tenke separa lei ho kultura ne’ebé bandu feto labele sai xefe suku.
“Ita-nia kultura ne’e, buat ketak ida, lei ne’e buat ketak ida, tanba nasaun ne’e ba oin, la’ós ba fali kotuk, entaun ba oin ne’e tenke ho lei,” nia afirma.
Notísia relevante: SEII ezekuta OJE 2023 atinje ona 33%
Jornalista: Sérgio da Cruz
Editór: Evaristo Soares Martins
