OÉ-CUSSE, 23 outubru 2023 (TATOLI – Atu garante pás no estabilidade, Sub-Komisaun Reguladóra Arte Marsiál (Sub-KRAM) Rejiaun Administrativa Espesiál Oé-Cusse Ambeno (RAEOA), segunda ne’e, hala’o fiskalizasaun ba Organizasaun Ikatan Kerasakti (IKS) iha sub-ranting Numbei aldeia Sanane Suku Costa sub-rejiaun Pante Makasar.
Notísia relevante: Komisaun G sei diskute proposta-lei prátika desportiva arte marsiál iha espesialidade
Prezidente sub-KRAM Oé-Cusse, Jeferino da Cruz Salu, hateten, programa fiskalizasaun ne’e nu’udar segundu diretiva KRAM nian, ho objetivu atu observa ba organizasaun sira hotu hodi buka hatene membru organizasaun sira, atu fó hanoin no enkoraza presiza mantein nafatin pás no estabilidade iha sosiedade nia leet.
Nune’e mós liuhosi fiskalizasaun ne’e bele hatene kada sub-ranting nia pesoál sira, tanba iha 2023 ne’e, sub-KRAM hasai ona formatu atualizasaun organizasaun arte marsiál ne’ebé iha, atu hatene kuantidade ne’ebé eziste iha Rejiaun Oé-Cusse,
“Sub-KRAM hala’o programa ida-ne’e, fiskalizasaun ba organizasaun hot-hotu iha fatin-fatin, fiskalizasaun ne’e signifika atu buka hatene, sira-na’in-hira feto hira no mane hira, atu rejista no asina no mós imi kontesta iha ne’e, situasaun di’ak ka la’e, tanba ne’e programa Governu Timor-Leste nian, atu ita hotu kontribui ba situasaun hakmatek, pás no estabilidade,” Jeferino da Cruz Salu, ko’alia iha ámbitu fiskalizasaun ne’e.
Prezidente sub-KRAM Oé-Cusse, orgullu, tanba konjuntura organizasaun ne’ebé ejizte iha Oé-Cusse hamutuk hitu, ho kompozisaun envolve membru kuaze 2000 bazea dadus KRAM iha 2021, maibé seidauk iha lista problema kona-ba problema arte marasiál.
“Tan ne’e, ohin ami mai to’o imi-nia fatin, la’ós IKS de’it maibé ami halo ona fiskalizasaun iha organizasaun sira seluk, PSHT, KORKA no seluk tan ami ba to’o Pássabe, ne’e atu hatene, idak-idak nia fatin treinu seguru kala’e, membru hira, iha kooperasaun di’ak ho komunidade kala’e ida-ne’e mak durante ne’e ita hala’o iha Oé-Cusse, atu fó hanoin bebeik ba imi,” nia haktuir.
Koordenadór IKS Rejiaun Oé-Cusse, Canisius Ole, agradese tanba liuhosi fiskalizasaun bele informa kona-bá regulamentu sira, nune’e bele banati tuir no kumpri hodi servi ba sosiedade.
“Ita tama iha organizasaun ida, nasaun mak regula ita hotu, ohin fiskaliza iha suku Costa, maibé ami hanesan responsavél organizasaun, sei informa tutan informasaun ne’ebé ohin ami hetan, transmite maluk sira iha fatin seluk nune’e ita hotu kumpri no kontribui ba iha prosesu dezenvolvimentu iha Oé-Cusse,” nia orgullu.
Entretantu, iha 26 abríl 2022 ne’e Governu liuhosi Sekretária Estadu Juventude no Desportu (SEJD), aprova ona legalidade ba arte marsiál tolu, IKS, PSHT no KORKA no públika ona iha jornál repúblika hodi bele halo treinu livre no sa’e sintu iha rai laran.
Bazea rezolusaun Governu númeru 14/2020, 02 marsu, ne’ebé revoga tiha rezolusaun númeru 16/2013 hodi fó informasaun ba Grupu Arte Marsiál tolu ne’e, presiza kumpre kritériu ne’ebé rejista hamutuk pontu 18.
Entretantu, tuir dadus ne’ebé sub-KRAM Oé-Cusse rejista, hamutuk organizasaun hitu (7) maka ejiste iha Oé-Cusse ho totál membru hamutuk 1.800-resin, komposta hosi Organizasaun Persaudaraan Setia Hati Terate (PSHT), organizasaun Ikatan Kera Sakti (IKS), organizasaun Kmanek Oan Rai-klaran (KORKA), organizasaun Perisai Diri (PD), THS-THM, Karate, Boxing, no Taek-wondo.
Notísia relevante: Governu inisia lejizlativa hodi rekoñese arte marsiál nu’udar atividade desportiva
Jornalista: Abílio Elo Nini
Editor: Rafael Ximenes de A. Belo
