OEKUSI, 18 Juñu 2026 (TATOLI) – Komandante Jerál (KomJer) Polísia Nasionál Timor-Leste (PNTL), Komisáriu Asistente Polísia Afonso dos Santos apela ba membru sira atu tane aas dignidade instituisaun nian no hatudu imajen di’ak ba nasaun, liuhusi evita prátika poligami ka iha feen rua.
“Ha’u-nia mensajen ikus, Polísia Nasionál Timor-Leste, iha feen ida de’it, laiha feen barak, semak iha fen rua, ha’u hasai! Ne’e orientasaun husi ha’u, iha fatin hothotu,” nia hateten hafoin vizita komandu PNTL Oekusi, ohin.
KomJer ne’e rekorda, ideia ne’e husi eis-Jenerál F-FDTL, Taur Matan ruak no Lere Anan Timur, tanba rekoñese katak instituisaun PNTL ne’e povu Timor-Leste nian nune’e obrigadu hatudu imajen di’ak ba públiku.
“Ha’u simu orientasaun ne’e husi ita-nia Maun Taur Matan Ruak ho Lere Anan Timur, dehan haree PNTL membru sira labele iha feen rua ka tolu, ne’e ita moe boot. Ita-nia dignidade instituisaun iha ne’ebé, tenki hatudu imajén di’ak ba nasaun,” nia afirma.
Notísia relevante:“Serbí ita-nia povu ho dignidade”
Iha biban ne’e, Madre Jelia Soares de Oliveira husi relijioza Carmelita Oekusi fó hanoin katak nu’udar sarani Katólika di’ak tenke respeita inan-feton sira, nune’e bele evita violénsia doméstika.
“Ita hotu komprende didi’ak, katak sakramentu ne’e sagradu. Sakramentu ne’e Maromak rasik mak hasantu ema-nia moris. Tan ne’e, bainhira simu ona sakramentu matrimóniu iha igreja promete ona atu hala’o moris ne’e loloos nu’udar feen ho laen no kaben-na’in di’ak Katólika, entaun labele hala’o moris ne’e rua-rua, labele iha feen barak. Ohin Komandante Jerál dehan sai ona atu polísia hothotu fó atensaun ba ida-ne’e, tanba ida-ne’e hanesan mós kazu ida, labele haterus feto maluk sira,” nia hateten.
Entretantu, apelu husi Komandante Jerál fundamenta mós iha Baze Legál no Kódigu Konduta PNTL, Rejime Disiplinar PNTL (Dekretu-Lei Nu. 13/2004) – O Regulamento Disciplinar da PNTL como corpo sistematizado de regras e princípios, é criado para nortear a actuação dos seus membros, que devem cultivar o brio profissional e empenharse na formação garantindo aprofissionalização e o prestígio da instituição. (Regulamentu Dixiplinár PNTL nian, nu’udar órgaun sistematizadu regra no prinsípiu sira nian, kria atu orienta ninia membru sira-nia asaun, ne’ebé tenke kuda orgullu profisionál no haka’as-an ba formasaun, hodi garante profisionalizasaun no prestíjiu instituisaun nian)
Jornalista: Abílio Elo Nini
Editór: Rafael Ximenes de A. Belo
