DILI, 25 outubru 2023 (TATOLI) – Organizasaun Naun Governamentál Fundasaun Mahein (FM), konkorda atu governu kria lei ka hamosu regulamentu internu ba prazu rezignasaun no fó multa ba membru FALINTIL-Forsa Defeza Timor-Leste (F-FDTL), ne’ebé rezigna aan la ho razaun klaru.
“Loos, tenke iha lei ka regra internu ida katak ema ne’ebé mak atu ba militár nia tenke assume vida militár ka tenke assume lima ka sanulu púr ezemplu, ne’e mak bele rezigna-aan,kuandu la to’o prazu mak tenke prevee konsekeuénsia iha lei ka regra interna atu iha sansaun ka multa”, Diretór Ezekutivu Fundasaun Mahein, Nelson Belo, hatete ba Agência TATOLI, iha kna’ar fatin-Bairro Central-Dili.
Notísia relevante: Halo lei ba membru F-FDTL ne’ebé rezigna aan atu selu fali Estadu
Nune’e, presiza duni regra interna ka lei ida hodi estipula artigu ida kona-ba sansaun ka multa ho prazu determinadu servisu instituisaun militár ba membru F-FDTL, maibé hakarak sai antes ka viola tenke fó multa.
Ho kazu hirak ne’e, nia husu governu tenke fó informasaun klaru atu kandidatu sira komprende didi’ak iha prosesu selesaun. Atu bainhira selesionadu ona ajente sira tenke komprende di’ak liu atu serbí tuir períodu ne’ebé determinadu tuir lei.
“Governu tenke estipula regra tanba hahú husi rekrutamentu governu investe ona ema. Ne’e duni tenke fó informasaun ne’ebé di’ak ba kandidatura atu aplika”, nia sujere.
Tanba, Nelson Belo lamenta bainhira membru F-FDTL ida rezigna-aan ho razaun presaun hosi familia. Maibé sei iha razaun uitoan ho razaun saúde.
Molok ne’e, Komodoro Higino das Neves, afirma presiza halo lei ba membru F-FDTL sira ne’ebé hakarak rezigna aan atu selu fila fali ba Estadu.
Komandu sei deside atu halo lei ida iha futuru ho objetivu atu garante F-FDTL sira nia servisu katak sé mak deside rezigna aan tan baruk, nia tenke selu fila fali Estadu nia osan, hahú hosi nia hakna’ar aan iha F-FDTL.
Deklarasaun ne’e sai bainhira membru FALINTIL-Forsa Defeza Timor-Leste (F-FDTL) hosi Komponente Navál ho naran Julio Garcia Pinto, tama F-FDTL iha 2009 ho númeru identifikasaun 20500901, Postu Cabo, deside rezigna aan hosi Instituisaun F-FDTL ho razaun falta hela de’it tanba problema partikulár..
Tanba joven sira mai atu hatutan FALINTIL sira nian mehi, la’os atu mai buka moris di’ak iha instituisaun tanba de’it iha liur la hetan osan.
Jornalista: Jesuína Xavier
Editór : Florencio Miranda Ximenes
