DILI, 06 novembru 2023 (TATOLI) –Provedoria Direitu Humanu no Justisa (PDHJ), husu ba Komite Revizaun Orsamentu (KRO) atu orsamenta adisionál rihun $996 hodi reforsa atividade tinan oin.
“Tetu orsamentu ne’ebé ami hetan hosi Ministériu Finansa ba Orsamentu Jerál Estadu (OJE) 2024 mak ami hetan milaun $1.2, orsamentu ne’e naton hela, entaun ohin iha aprezentasaun iha Komite Revizaun Orsamentu ami husu tán orsamentu adisionál $996 mil ho objetivu atu finansia liután programa PDHJ nian iha tinan oin”, Prevedór Direitus Humanus no Justisa, Vergílio da Silva Guterres, hateten ba jornalista sira hafoin halo aprezentasaun iha KRO iha Ministériu Finansa, segunda ne’e.
Nia dehan, PDHJ nia prioridade iha tinan oin mak atu konserta iha levantamentu estudu sira ne’ebé relasiona ho direitu umanu no direitu públiku nian no formasaun direitu umanu ba polísia atu sira bele halo sira nian servisu ho di’ak, fó formasaun direitu umanu ba sidadaun sira no halo kooperasaun ho universidade sira atu sensibiliza direitu umanu hodi ema respeita direitu ne’e.
“Depois ami halo tiha aprezentasaun ba ami nian programa prioridade sira ne’e, Primeiru-Ministru enkoraza atu Provedoria Direitu Humanu no Justisa atu konserta iha formasaun sira ne’e atu ema bele respeita direitu umanu”, Virgílio Guterres afirma.
“Primeiru-Ministru hatete katak provedoria direitu umanu nia servisu ne’e importante atu hasae konsiénsia entidade públika sira, hanesan entidade polísia, sidadaun sira kona-ba direitu umanu, entaun sei konsidera atu aprova orsamentu adisionál ne’ebe PDHJ hato’o, oinsá atu halo promosaun no prevensaun atu ema bele respeita direitu umanu”, nia adianta.
Jornalista: Natalino Costa
Editór : Zezito SIlva
