DILI, 26 Juñu 2026 (TATOLI)—Silénsiu hale’u Rezidénsia Saudozu Antigu Prezidente Repúblika Timor-Leste, Francisco Guterres ‘Lú Olo’ iha Farol, Sesta dadeer. Molok mate-isin ne’e atu translada entrega ba Estadu hodi haloot, Sekretáriu-Jerál FRETILIN, Mari Alkatiri to’o fatin hodi hato’o despedida ikus ba nia kamarada.
Mari Alkatiri to’o iha Saudozu nia rezidénsia maizumenus tuku 06:30 dadeer, hamutuk ho nia espoza. Sira na’in-rua la’o neneik tama ba rezidénsia laran, hodi hamutuk ho liña formatura nian ne’ebé to’o ona dezde dadeer, hodi fó sira-nia omenajen ikus ba figura xave ida iha luta ba independénsia Timor-Leste nian.
Mari nia oin kolen liu, no matan hateke de’it ba Saudozu nia Kaisaun, no nia matan nakonu ho matan-been, nakonu ho tristeza kle’an. Lahó liafuan ida mak ko’alia sai, nia hakat bá Lú Olo nia kaixaun.
Notísia relevante : Alkatiri agradese desizaun Estadu haloot Lú Olo entre Francisco Xavier no Ma’huno
To’o iha kaixaun nia oin, Mari hamriik nonook ba momentu ida. Neneik, nia kumu metin nia liman-loos, hafoin foti a’as nu’udar omenajen ikus ba nia belun, ne’ebé akompaña ona nia iha kualker situasaun luta nasaun nian, hahú husi rezisténsia to’o harii nasaun independente ida.
Iha nia sorin, nia espoza labele tahan nia laran-susar. Matan-been kontinua suli iha omenajen tomak. Atmosfera laran-susar aumenta maka’as bainhira guarda sira no sira ne’ebé akompaña Mari mós hato’o sira-nia laran-susar. Matan-been suli iha fatin nee, hodi reflete lakon klean ne’ebé sente tanba lakon líder no kamarada ida.
Hafoin hadook-an hosi kaixaun, sira hakuak Mari Alkatiri ida pur ida. Hakuak sira ne’e nu’udar espresaun silénsiu ida kondolénsia nian, hanesan sira fahe todan hosi Antigu Primeiru-Ministru nia lakon belun ida ne’ebé dedika nia moris hamutuk ba Timor-Leste nia independénsia.
Iha uma Saudozu nia li’ur, atmosfera mós nakonu ho atividade. Ekipa sira hamoos hela área monta barraka nian, ne’ebé sai hanesan fatin ba públiku atu fó sira nia respeitu durante loron balun. Ai-funan sira ne’ebé antes ne’e enfeita ona moru uma nian, transporta uluk ona ba Jardín Eroi iha Metinaru, enkuantu sira seluk lori bá Igreja Katedrál hodi halo prosisaun tuirmai.
Membru FALINTIL-Falintil Forsa Defeza Timor-Leste (F-FDTL) hamutuk na’in-12 iha ona formasaun onra nian, lori sira-nia kilat. Enkuantu Polísia Militár, F-FDTL, no ofisiál sira seluk hamriik iha pozisaun respeitu hodi hein prosisaun hodi akompaña Saudozu nia kadaver husi Rezidénsia Farol.
Entretantu, karreta matebian F-FDTL ne’ebé tula ona Lú Olo husi Aeroportu Internasionál Prezidente Nicolau Lobato iha loron balun antes ne’e, prepara fali atu akompaña Antigu Prezidente Repúblika iha ninia viajen ikus.
Prosisaun ne’e sei la’o ba Komité Sentrál FRETILIN (CCF), hafoin kontinua ba Kuartél Jerál F-FDTL, Palásiu Prezidensiál, Igreja Katedrál, no Parlamentu Nasionál, molok ikusmai dirije ba Jardín Eroi iha Metinaru ba nia deskansa ikus.
Jornalista : Cidalia Fátima
Editora : Julia Chatarina
