Alkatiri agradese desizaun Estadu haloot Lú Olo entre Francisco Xavier no Ma’huno

DILI, 24 Juñu 2026 (TATOLI) – Sekretáriu-Jerál Partidu FRETILIN, Marí Alkatiri, hato’o agradesimentu ba Governu no Estadu ne’ebé deside fatin haloot maktoban antigu Prezidente Repúblika, Francisco Guterres “Lú Olo”, entre Proklamadór Francisco Xavier do Amaral no Ma’huno nia klaran, iha Jardín Eroi Metinaru.

“Governu deside ida-ne’e tanba ami mak hahú prosesu. Ba ida-ne’e obrigadu. Ami dehan klaru katak nia iha direitu atu hetan tanba nia ema ida mai husi povu ki’ik tebes duni”, Marí Alkariti hateten iha Faról, ohin.

Nia haktuir katak maktoban Lú Olo dezde 1975 sai militante FRETILIN, sai asistente polítika, sai Sekretáriu Komisaun Diretiva FRETILIN iha luta Armada no nia tun mai sai fali Prezidente Asembleia Konstituiente no halo Konstituisaun.

“Hotu sai tiha hanesan eis-titulár, maibé kontinua sai fali Prezidente Repúblika, ida-ne’e hatudu momoos nia mai husi povu duni no sai Estadu nia ema tanba kria Estadu. Ami serbisu hamutuk duni ba ida-ne’e, maibé nia mak lidera prosesu ida-ne’e”, Alkatiri haktuir.

Serimónia fúnebre ba maktoban Lú Olo sei realiza iha 26 Juñu 2026, ho sekuénsia atividade ne’ebé prepara ona antes selebrasaun ofisiál.

Iha sesta-feira dadeer, 26 Juñu, korpu matebian sei lori husi rezidénsia bá Sede Komité Sentrál FRETILIN, depois kontinua bá Kuartél Jenerál F-FDTL iha Fatuhada.

Hafoin ramata vizita bá instituisaun relevante sira, sei lori matebian bá Igreja Katedrál, Dili, hodi realiza misa requiem no presta omenajen ikus pur volta tuku 11h00, hafoin lori bá Jardín Eroi Metinaru.

Notísia relevante: Sei haloot Lú Olo entre Proklamadór Francisco Xavier no Ma’Huno iha Jardín Eroi Metinaru 

Jornalista: Arminda Fonseca

Editora: Maria Auxiliadora