DILI, 13 novembru 2023 (TATOLI)—Timor-Leste, segunda ne’e, realiza eleisaun suku segunda ronda iha suku 271 ne’ebé naklekar iha munisípiu 12 inlklui Ataúro no Rejiaun Administrativa Espesiál Oé-Cusse Ambeno (RAEOA).
Tuir dadus, suku hamutuk 271 ne’ebé avansa ba eleisaun segunda volta iha territóriu nasionál ne’ebé bazeia ba lista kada munisípiu mak hanesan;
- Munisípiu Aileu iha suku 24
- Munisípiu Ainaro iha suku 16
- MunisipiuBaucau iha suku 35
- Munisípiu Bobonaro iha suku 27
- Munisípiu Covalima iha suku 24
- Munisípiu Dili iha suku 18
- Munisípiu Ermera iha suku 29
- Munisípiu Lautém iha suku 16
- Munisípiu Liquisa iha suku 16
- Munisípiu Manatuto iha suku 15
- Munisípiu Manufahi iha suku 18
- Munisípiu Viqueque iha suku 22
- RAEOA iha suku sia (9)
- Iha Ataúro ne’e iha suku rua (2).
Antes ne’e, Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten hosi kandidatura xefe suku 251 maihosi totál suku 442 ne’e hatudu katak kandidatu xefe suku 191 mak eleitu iha eleisaun suku primeira volta no hirak seluk ne’e avansa ba eleisaun segunda ronda.
Tuir Ofisiál Supervizaun Eleitorál (OSE) hosi Komisaun Nasionál Eleisaun (CNE, sigla portugés) destaka ba suku sira iha Timor-Leste rekolla ne’e, hatudu katak kandidatu xefe suku hamutuk 2.117 ne’ebé kompostu hosi feto 241 (11,38%) no mane hamutuk 1876 (88,62%) mak konkorre iha iha eleisaun suku primeira volta iha 28 outubru 2023 liuba ne’e.
Hosi kandidatura xefe suku hirak ne’e, Sekretária Estadu Igualdade (SEI), Elvina Sousa Carvalho, hateten feto iha territóriu nasionál hamutuk 241 mak kandidata-aan atu sai xefe suku hodi kompete iha eleisaun suku iha 28 outubru 2023.
“Dadus ne’ebé mak verifikadu ba totál feto kandidata-aan ba eleisaun komunitária no hakarak sai lideransa suku hamutukl 241 ho ekivalente ba 11%. Ida-ne’e hatudu katak feto iha interrese atu sai lideransa lokál,” Elvina Sousa Carvalho hateten.
Nia halo komparasaun eleisaun suku ne’ebé mak realiza dala tolu ona hahú tinan 2004 ho feto na’in-hitu (7), iha 2009 númeru feto sa’e ba na’in-11, iha 2016 feto aumenta ba na’in-21 no iha tinan 2016 nian ne’e totál suku 452 no xefe suku feto iha 21 no ba aldeia 2.233 ne’e ho xefe aldeia feto hamutuk 94.
Jornalista : Osória Marques
Editór : Cancio Ximenes
