DILI, 21 novembru 2023 (TATOLI)-KayOlok Sword Gusmão, tersa ne’e lansa ona ninia fundasaun ho naran KayOlok ho objetivu atu promove joven jerasaun foun sira liuhosi apoiu sosiál no formasaun sira hodi sai modellu ba dezenvolvimentu Timor-Leste.
Prezidente Fundasaun KayOlok, KayOlok Sword Gusmão, hateten ejiztensia Fundasaun KayOlok atu tau matan ba grupu vulnerável sira ne’ebé la hetan oportunidade hodi partisipa iha dezenvolvimentu nasaun nian.
“Ha’u hakarak tau matan ba povu vulnerável sira liuliu ba joven feto ho mane no iha mós planu ne’ebé inklui ba agrikultór no desportu. Ho ida-ne’e ha’u orgullu tebes tanba ohin hamriik iha ne’e nu’udar Prezidente Fundasaun Kay Olok,” KayOlok hateten hafoin asina akordu servisu ho Fundasaun Sala Leitura Xanana Gusmão, iha Lecidere, Dili, tersa ne’e.
Oan husi Kay Rala Xanana Gusmão ne’e informa Fundasaun KayOlok ho ninia misaun no objetivu sira maka hakarak promove joven jerasaun foun hodi sai modelu ba dezenvolvimentu nasionál nian.
“Espera katak ho akordu ne’e bele organiza malu hala’o ita-nia servisu ho di’ak liután hahú agora no futuru. Maibé ami hatene no rekoñese katak IX Governu konstituisional loke dalan atu fó opurtunidade ba juventude iha setór hotu-hotu tinan hirak mai. Tanba ne’e iha asina akordu ne’e ami iha komitmentu forte atu kontribui ba dezenvolvimentu integrada setór nian ne’ebé loke dalan ba timoroan tomak hodi hola parte iha dezenvolvimentu nasionál. Nune’e ha’u agradese tebes ba ita-boot sira-nia kontribuisaun no tempu hodi hanorin ha’u”, nia dehan.
Iha tempu hanesan Reprezentante Membru Konsellu Xanana Reading Room, atuál Ministra Edukasaun (ME), Dulce de Jesus, dehan Fundasaun Sala de Leitura Xanana prontu atu servisu hamutuk ho ekipa Fundasaun KayOlok.
“Ami prontu servisu hamutuk ho ekipa hotu hosi Fundasaun KayOlok nian ne’ebé la’o ba di’ak liután no hala’o knaar tuir misaun, vizaun iha Fundasaun ne’e. Ha’u hanoin sala leitura nafatin prontu servisu hamutuk hanesan planu ne’ebé temi ona,” konklui.
Jornalista : Osória Marques
Editór : Agapito dos Santos
