DILI, 12 Juñu 2026 (TATOLI) – Segundu Vise-Prezidente Parlamentu Nasionál, Duarte Nunes, hateten katak projetu lei sétima alterasaun Kódigu Penál kona-ba kriminaliza defamasaun no injúria iha hela prosesu diskusaun iha Komisaun A ne’ebé trata Asuntu Konstitusionál no Justisa.
Duarte Nunes hato’o informasaun ne’e bainhira responde ba deklarasaun Prezidente Repúblika, José Ramos-Horta, ne’ebé antes hatudu nia pozisaun ba inisiativa lejizlativa ne’e. Prezidente konsidera katak proposta ne’e bele fó impaktu ba liberdade espresaun no liberdade imprensa iha Timor-Leste. Nia dehan karik lori lei ne’e bá nia meza, nia sei veta.
Tuir Duarte Nunes, depoizde finaliza diskusaun iha komisaun, projetu lei ne’e sei lori ba Prezidente Parlamentu Nasionál atu ajenda ba diskusaun iha plenária, liuhusi faze jeneralidade, espesialidade no votasaun finál globál.
Nia esplika katak inisiativa ba projetu ne’e mai husi deputadu balun, nune’e prosesu lejizlativu tenke kontinua tuir regra no prosedimentu ne’ebé estabelese ona.
Antes ne’e, Prezidente Komisaun A, Natalino dos Santos, hateten katak razaun atu kriminaliza defamasaun no injuria bazeia ba nesesidade atu proteje onra no privasidade sidadaun sira, henesan previstu iha Konstituisaun iha artigu 36.
Nia dehan inisiativa ne’e mosu tanba ezijénsia husi sosiedade kona-ba situasaun ohin loron. “Estadu tenke iha regra. Iha Konstituisaun artigu 41 kona-ba liberdade espresaun, maibé tenke regula, labele liberdade espresaun konfrome espresa tuir ita-nia hakarak, laiha ona norma umanu, étika, kultura, entaun ita tenke fó regra ida balansu direitu no devér”, dehan.
Parlamentu iha kna’r atu halo lei tuir ninia prosesu sira bainhira aprovasaun sei lori ba Prezidente Repúblika maki ha kompeténsia atu promulga no bele husu inkonstituisionalidade iha tribunál.
Notísia relevante: PLP: “Kriminaliza defamasaun bele lori retrosesu ba ita-nia demokrasia”
Jornalista: Nelson de Sousa
Editora: Maria Auxiliadora
