DILI, 24 novembru 2023 (TATOLI) – Lista estudante 1.646 ne’ebé atu hetan pagamentu bolsa méritu ba faze datoluk nian submete ona ba Banku Nasionál Komérsiu Timor-Leste (BNCTL) hodi halo verifikasaun ba konta bankária.
“Ita foin haruka estudante benefisiáriu bolsa meritu sira-nian lista ba tan ona BNCTL atu halo prosesu verifikasaun ba dokumentu hotu. Tanba ne’e regra banku nian, entaun presiza verifika uluk no kuandu dokumentu benefisiáriu sira-nian maka la’o tuir duni banku nia kritériu, sira bele halo ona transferénsia”, Diretór-Jerál Edukasaun no Ensinu Ministériu Edukasaun, Deolindo da Cruz, informa iha Vila Verde, ohin.
Dirijente ne’e dehan molok banku halo transferénsia osan ba konta benefisiáriu nian, tenke submete fali rezultadu verifikasaun ba ministériu atu hetan koñesimentu ba dadus hirak maka pasa no hira mak la’e iha prosesu verifikasaun, nune’e ministériu informa fali ba estudante sira hodi kompleta dokumentu.
Dirijente ne’e hatutan katak totál verba ne’ebé maka Ministériu Edukasaun transfere hamutuk ho dadus estudante benefisiáriu bolsa méritu ba banku ne’e hamutuk $931.400.
Membru Komisaun Ezekutivu BNCTL, Joaquim Martins, afirma katak dadus estudante bolsa méritu 1.646 nian ne’ebé tama ba faze datoluk ne’e banku foin simu ohin. Dadus sira ne’e agora sei iha hela prosesu verifikasaun nia laran no kuandu remata ona maka sei informa fali ba Ministeriu Edukasaun.
“Agora halo hela prosesu verifikasaun ne’ebé presiza atu haree didi’ak estudante sira-ninia konta bankária atu labele sala, tanba konta ne’ebé ita presiza atu kredita osan ba ne’e maka konta bankária buka matenek ne’e no labele konta seluk”, dehan.
Notísia relevante: Banku halo transferénsia osan faze daruak ba benefisiáriu bolsa méritu
Jornalista: Tomé Amado
Editora: Maria Auxiliadora
