DILI, 28 agostu 2023 (TATOLI) – Banku Nasionál Komérsiu Timor-Leste (BNCTL) haruka ona osan ba konta estudante bolsa méritu 1.672 ho montante $923.500, informa Xefe Divizaun Tezouru BNCTL, Joaquim Martins.
Prosesu transferésia osan realiza iha sesta (25/08) liubá, maibé sei iha estudante 399 maka to’o agora seidauk hetan sira-nian direitu tanba uza fali konta bankária seluk no la’ós konta poupansa matenek. Benefisiáriu sira ne’e hetan nafatin oportunidade hodi muda dokumentu sira, nune’e bele hetan pagamentu iha faze datoluk.
“Estudante 1.672 nia direitu ita halo kredita ba konta bankária iha semana kotuk ne’e tanba kumpre ona rekizitu no regra sira hodi ba renova fali konta bankária ba poupansa matenek nian”, Joaquim reitera, iha Mandarin, ohin.
Banku nafatin serbisu hamutuk ho Ministériu Edukasaun hodi bele finaliza pagamentu ba bolsa méritu, nune’e bele haree fali ba prosesu tuirmai maka sira ne’ebé mak ladauk hetan direitu ba programa ne’e, tanba dadus konfirmadu ba benefisiáriu bolsa méritu hamutuk 12.927, maibé to’o ohin loron banku foin simu de’it lista hamutuk 7.478.
Iha sorin seluk Pricília Daniela Ximenes, estudante Sekundáriu Jerál Hera konfirma katak nia simu ona subsídiu $458 iha faze dahuluk. Nia hetan montante ne’e tanba tama iha klasifikasaun kuatru lugar.
“Osan ne’ebé ha’u simu husi programa bolsa méritu ne’e uza ba nesesidade eskola nian kuandu urjente”, dehan.
Pricília Ximenes daudaun iha ona désimu segundu anu no tinan ida ne’e akaba ona ninia estudu no sei kontinua ba universidade. Nia husu ba IX Governu atu mantein programa ne’e tanba motiva sira hodi estuda maka’as.
Iha faze dahuluk, BNCTL transfere ona osan millaun $3 ba konta benefisiáriu bolsa méritu 5.407 nian.
Notísia relevante: BNCTL transfere ona osan ba benefisiáriu bolsa méritu 5.407
Jornalista: Tomé Amado
Editora: Maria Auxiliadora
