BNCTL transfere ona osan ba benefisiáriu bolsa méritu 5.407
DILI, 01 agostu 2023 (TATOLI) – Banku Nasional Komérsiu Timor-Leste (BNCTL, sigla portugés) transfere ona, iha faze dahuluk, osan millaun $3 ba konta benefisiáriu bolsa méritu 5.407 nian, tanba dokumentu husi estudante sira ne’e laiha problema.
“Prosesu pagamentu bolsa méritu ba estudante sira realiza ona iha segunda-feira, 31 jullu, maibé pagamentu ne’e la maioria tanba iha dokumentu ka dadus balun maka ita konsidera presiza atualiza fali husi Ministériu Edukasaun, liuliu konta bankária estudante sira-nian”, Xefe Divizaun Tezouru BNCTL, Joaquim Martins, informa ba Tatoli, iha Mandarin, ohin.
Joaquim Martins afirma katak antes ne’e banku simu ona osan millaun $4,2 husi Ministériu Edukasaun atu selu ba estudante bolsa méritu rihun 7-resin (iha faze dahuluk) iha territóriu, maibé seidauk bele selu hotu tanba estudante balun presiza hadi’a sira-nian dokumentu bankáriu.
Nune’e sei falta osan millaun $1,2 mak seidauk transfere ba konta estudante 2.071 tanba konsidera sei iha problema. Tuir esplikasaun ne’ebé BNCTL hato’o katak dokumentu ka konta bankária ne’ebé estudante sira haruka bá ne’e la indika ho loloos ba konta bankária poupansa matenek, maibé ba fali konta bankária sira seluk.
“Ita presiza sira-nian konta bankária ne’ebé indika ba pasa matenek ne’e, la’ós konta bankária sira seluk. Ezemplu, estudante balun haruka fali konta bankária indika ba asu’ain, konta veteranu, konta ha’u-nian futuru, konta poupansa ordinária nomós balun konta nulu no seluk fali kuaze ema 38 maka nia konta dobru”, salienta.
Ho problema sira ne’e maka BNCTL labele halo prosesu hodi haruka osan ba konta benefisiáriu sira ne’e. Banku halo ona konfirmasaun ho Ministériu Edukasaun hodi husu sira-nian hanoin, nune’e bele iha resposta ruma atubele garante servisu BNCTL nian iha prosesu transferénsia osan bolsa méritu ne’e.
“Ita sei kontinua halo fali akreditasaun osan segunda faze ba konta bankária estudante sira ne’ebé sei iha problema no karik ita hetan ona dadus loos husi Ministériu Edukasaun”, realsa.
Responsavel ne’e husu ba estudante sira ne’ebé maka hetan ona sira-nian direitu atu halo ona konfirmasaun ba sira-nian konta bankária iha infraestrutura BCTL sira ne’ebé instala ona iha territóriu atubele hatene montante hira maka transfere ona.
Tuir dadus husi Ministériu Edukasaun, totál benefisiáriu bolsa méritu hamutuk 12.927.
Notísia relevante: Ministra Edukasaun orienta atu aselera pagamentu bolsa méritu
Jornalista: Tomé Amado
Editora: Maria Auxiliadora
