DILI, 20 jullu 2023 (TATOLI) – Ministra Edukasaun, Dulce de Jesus, orienta ona diretór-jerál sira Edukasaun Ensinu no Administrasaun no Finansa atu aselera pagamentu bolsa méritu, nune’e labele hamosu problema.
“Osan ne’ebé prevee ba pagamentu bolsa méritu ba estudante 12-resin ne’e, haree husi record sistema finansa sentrál ne’e ezekuta ka uza tiha ona”, Dulce de Jesus hatete kestaun ne’e iha enkontru ho parte tékniku sira hodi ko’alia kona-ba progresu konstrusaun no reabilitasaun infraestrutura edukativa (PKRIE), iha Vila Verde.
Nia dehan osan ne’ebé sai husi kaixa jerál Estadu ne’e iha sistema finansa nian sai ona atuál katak uza tiha ona kuaze 90%-resin, maibé mai fali iha Ministériu Edukasaun osan ne’e sei iha hela Banku Nasionál Komérsiu Timor-Leste (BNCTL, sigla portugés) no seidauk ezekuta.
Nune’e iha mandatu IX Governu nian, Ministra Dulce sei tolera sistema ida hanesan ne’e, tanba hatudu katak iha buat balun laloos no demostra katak falta responsabilidade ba programa ne’e.
“Ita tenke halo lalais pagamentu bolsa méritu ba ita-nian estudante sira no bainhira Ministra Finansa foun hanoin atu halo alterasaun ba lei ida agora ne’e, entaun Ministériu Edukasaun la hetan problema”, dehan.
Ho kestaun ne’e maka governante ne’e husu ba dirijente sira atu serbisu hamutuk hodi lori progresu ba edukasaun iha Timor Leste, liuliu bele hadi’a imajen ministériu nian atu tinan lima nia laran ne’e bele halo buat balun iha área refere.
Relembra katak Diretór-Ezekutivu BNCTL, Alcino Monteiro, informa antes katak banku seidauk bele transfere osan ba konta bankária benefisiáriu bolsa méritu 5.190 iha faze dahuluk husi totál 12.927, tanba presiza ajusta dadus estudante sira husi munisípiu Ainaro no Viqueque tanba montante osan boot liu fali númeru benefisiáriu.
Dirijente ne’e dehan osan ne’ebé banku atu selu ba benefisiáriu husi munisípiu rua ne’e boot liu fali totál lista benefisiáriu sira-nian mak husi Ainaro iha totál sumáriu ne’ebé prevee hamutuk rihun $170, bainhira selu ba benefisiáriu sira sei iha restu $50 no husi Viqueque totál sumáriu hamutuk rihun $276, kuandu selu hotu ba benefisiáriu sira sei iha restu $500.
Ba benefisiáriu iha munisípiu 11 ne’ebé nia dadus laiha ona problema no banku sei haruka ekipa ida bá hasoru malu ho Diresaun-Jerál Administrasaun no Jestaun Finansa Ministériu Edukasaun nian atu haree asuntu ne’e hodi bele rezolve lalais.
Iha sorin seluk, Diretór-Jerál Administrasaun no Finansa, Antoninho Pires, haktuir katak kona-ba lista husi munisípiu Ainaro no Viqueque nian ne’ebé BNCTL konsidera problema ne’e seidauk to’o iha nia meza.
Tanba ne’e maka to’o agora Ministériu Edukasaun konsidera katak buat hotu hein de’it desizaun banku nia no bainhira maka atu selu estudante sira ne’e, tanba akordu ne’ebé maka parte ministériu no banku halo iha fulan-juñu fulan ne’e konsidera laiha ona problema.
Nia salienta, ba munisípiu 11 ne’ebé laiha ona problema ho dokumentu sira, antes ne’e Edukasaun orienta ona banku atu hahú ona halo pagamentu, maibé to’o loron ohin sira seidauk halo.
Totál osan ne’ebé maka ministériu no banku konkorda atu uza hodi halo pagamentu ba estudante bolsa méritu iha faze dahuluk ne’e ho montante millaun $4,2.
Noísia relevante: BNCTL seidauk transfere osan ba benefisiáriu bolsa méritu
Jornalista: Tomé Amado
Editora: Maria Auxiliadora
