DILI, 19 dezembru 2023 (TATOLI)—Ministériu Agrikultura Pekuária Peska no Floresta (MAPPF) planeia ona iha tinan 2024 sei serbisu hamutuk ho Ministériu Administrasaun Estatál (MAE) liuhosi Autoridade lokál sira hodi hasa’e produsaun agríkola.
“Ita iha planu ida, iha tempu badak halo enkontru ho Autoridade lokál, Prezidente Autoridade no Administradór postu sira iha territóriu laran hodi sira bele konvense populasaun, liu-liu joven sira hodi filafali ba halo to’os no natar hodi hasa’e produsaun agríkola,”Diretór Nasionál Agrikultura Peska no Ortikultura hosi Ministériu Agrikultura Pekuária Peska no Floresta (MAPPF), Lucio Ribeiro, informa ba Agência Tatoli, via telefónika, tersa ne’e.
Nia dehan, razaun hakarak envolve MAE tanba ministériu ne’e mak ukun povu hahú hosi munisípiu to’o aldeia, tanba ne’e sira bele konvense autoridade sira atu lori populasaun joven feto mane konsentra iha fatin ida halo to’os no natar.
“Karik hala’o serbisu no planu di’ak, maka iha futuru mai Governu sei ajuda insentivu. Ami-nia parte só apoiu tékniku, ekipamentu tratór, fini, mina enxe ba tratór maibé organiza ema ka joven atu halo natar no to’os ne’e hosi autoridade nia serbisu ho razaun oinsá hasa’e produsaun agríkola no hamenus foos importasaun sira,” nia akresenta.
Notísia relevante : MAPPF fó prioridade hasa’e produsaun rai-laran
Kona-ba montante insentivu operasionál ba ema halo natar, parte ministériu prepara hotu ona maibé seidauk bele fó sai nia valór tanba iha hela diskusaun nia laran.
“Ida-ne’e tenke bazeia ba baze legál ruma nune’e iha futuru bele responsabiliza ba Orsamentu Jerál Estadu Governu,” nia dehan.
Tanba ne’e, Diretór husu ba maluk to’os-na’in sira, liu-liu joven sira atu labele moe no baruk ba vida agrikultór tanba vida agrikultór ne’e bele hetan benefísiu boot.
“Loloos ne’e agrikultura hanesaun setór prinsipál ba ema foin-sa’e sira atu envolve-an tanba hosi área ne’e bele moris di’ak tanba serbisu hanesan atan maibé han hanesan liurai. Maibé realidade iha Timor seidauk akontese, tanba ne’e presıza halo aprosimasaun hosi métodu oin-oin atubele konvense joven sıra hodi bele envolve-an iha agrikultura,” Diretór tenik.
Jornalista : Arminda Fonseca
Editora : Julia Chatarina
