DILI, 03 janeiru 2024(TATOLI) – Kaderneta Passaporte iha faze dahuluk hamutuk 16.000 distribui hotu ona, hosi nasionál to’o munisipál, no hein tan faze daruak ho totál liu rihun 57 ne’ebé sei halo hela produsaun iha Finlándia.
Kaderneta Passaporte rihun 16-000, antes ne’e, to’o iha Timor-Leste iha 16 novembru 2023, no faze daruak iha 57.000-resin mak oras ne’e daudaun sei iha hela prosesu produsaun iha Filándia.
Rekorda katak Governu liuhosi Konsellu Ministru iha loron 11 outubru 2023 aprova akizasaun ba Kaderneta Passaporte Timor-Leste hamutuk 73.840 iha Filándia.
Diretór Jerál Servisu Rejistu Notariadu (DGSRN), João Fernado Martins Borges, hateten Kaderneta Passaporte ba faze daruak nian, molok ne’e, Governu liuhosi Konsellu Ministru Kontrata Empreza Thales atu halo produsaun kaderneta passaporte Timor-Leste iha Finlándia, maibé kaderneta passaporte faze daruak la hatene los atu mai bainhira.
Tanba ne’e, Diretór João Fernando, hateten Ministériu Justisa, liuhosi DGSRN suspende ona atendimentu passaporte tanba estoke passaporte hamutuk 16.000 ne’ebé mak antes ne’e mai hotu ona.
“Avizu ne’ebé mak ami taka sai ne’e realidade mak ida-ne’e, estoke kaderneta 16.000 ne’ebé mak mai iha 16 novembru 2023 hotu ona no provizoriamente ita taka atendimentu hodi hein estoke kaderneta foun mai”, João Fernando ba jornalista sira iha nia kna’ar fatin, Colmera, kuarta ne’e.
Nia dehan, hafoin Kadertenta Passaporte mai iha 16 novembru 2023, Ministériu Justisa, liuhosi Diresaun Jerál Servisu Rejistu Notariadu nasionál to’o munisipál loke fali atedimentu passaporte ba públiku.
“Ita-nia atedimentu passaporte la’os halo de’it iha nasionál, maibé ita konsentra hotu ba munisípiu sira, sidadaun iha munisípiu idak-idak bele halo sira-nia passaporte iha ne’ebá”, nia informa.
“Atedimentu passaporte ne’e ita konsege halo de’it fulan ida ho balun tanba pedidu hosi ita-nia sidadaun sira ne’ebé mai halo passaporte iha nivél nasionál inklui munisípiu barak demais, tanba ne’e ita-nia estoke kaderneta passaporte tenke hotu lalais”, nia dehan.
João hateten, estoke kaderneta passaporte ne’ebé hotu ona mak Diresaun Jerál Servisu Notariadu hosi nivél nasionál to’o munisípiu sei suspende provizóriu kona-ba atendimentu passaporte, maibé kuandu estoke passaporte iha fali maka notariadu sei halo fali atendimentu.
Nia dehan, notariadu seidauk garante katak bainhira mak kaderneta passaporte faze daruak sei to’o iha Timor-Leste.
“Ha’u la garantia, depois ita akompaña hamutuk, kuandu mai ona ami sei taka sai avizu”, nia afirma.
Atendimentu passaporte kestaun emerjénsia hanesan ema moras, João ne’e afirma, kestaun ne’e depois mak notariadu sei haree.
“Husu deskulpa ba situasaun ida-ne’e, tanba situasaun ne’e halo sidadaun sira ka rekerente lamentavél no ami rekoñese katak ita-nia situsaun mak ne’e. Ita-nia pedidu passaporte aas demais kaderneta passaporte ita halo atendimentu ba fulan ida ho balun de’it no ita uza hotu ona, tanba ne’e husu hothotu nian komprensaun hodi hein kaderneta foun tama mai”, nia fó hanoin.
Notísia relevante : http://Kaleideskopia: MJ konsege rezolve kaderneta passaporte
Jornalista: Natalino Costa
Editór : Zezito Silva
