DÍLI, 13 Juñu 2026 (TATOLI) – Embaixada Reinu Tailándia iha Timor-Leste hamutuk ho Asosiasaun Antigu Alunu Timoroan iha Tailándia (AATST-Sigla Inglés), Sábadu ne’e realiza sesaun partilla koñesimentu kona-ba Seguransa Internet Sharing Session on Internet Safety ba estudante na’in-50 iha Ensinu Sekundáriu Tékniku-Vokasionál (ESTV) Becora, Dili.
Embaixadór Tailándia ba Timor-Leste, Atipat Rojanapaibulya, hateten atividade ne’e fasilita husi AATST ho objetivu atu hasa’e koñesimentu no konsiénsia estudante sira-nian kona-ba utilizasaun internet ne’ebé seguru no responsável.
“Hau husu ba imi aproveita fahe lisaun seguransa internet ida-ne’e ho didak hodi bele ajuda ita nia estudante sira uza internet ba online ho seguru,” Embaixadór Atipat Rojanapaibulya hateten ba TATOLI iha ESTV Becora, Dili.
Prezidente AATST, Sandra Lemos, esplika katak programa ne’e hetan apoiu husi Embaixada Tailándia iha Timor-Leste ho objetivu atu fó oportunidade ba estudante sira hodi aprende no komprende liután kona-ba seguransa internet, ne’ebé sai tema importante iha era dijitál atual.
“Seguransa internet importante tebés ba estudante sekundáriu tanba iha tempu agora maioria estudante sira uza internet loroloron ba aprendizajen no komunikasaun. Maibé se la uza ho kuidadu, internet bele lori risku hanesan cyberbullying, informasaun falsu (fake news), fraude online no abuzu dadus privadu,” nia dehan.
Sandra akresenta katak bainhira sira hatene one kona-ba seguransa internet, maka sira bele proteje sira nia-an, sira-nia informasaun pesoál no uza internet ho responsabilidade.
Tuir Sandra, koñesimentu ne’ebé estudante sira hetan liuhosi atividade ne’e sei importante ba sira nia futuru, tanba bele ajuda sira sai sidadaun dijitál ne’ebé literadu, responsavel no preparadu atu hasoru dezafiu sira iha mundu modernu.
Iha fatin hanesan, Diretora ESTV Becora, Benedita de Almeida agradese ba Embaixada Tailándia no AATST tanba organiza atividade edukativa ne’e ba estudante sira iha eskola referida.
Nia hateten katak formasaun kona-ba seguransa internet sei kontribui atu aumenta koñesimentu estudante sira kona-ba oinsá uza internet ho seguru iha prosesu aprendizajen no iha moris lor-loron.
“Lori estrutura tomak ESTV Becora nia naran, ami agradese ba Embaixada Tailándia no AATST ne’ebé fahe lisaun seguransa internet ba ami nia estudante sira. Ami husu mos ba estudante sira atu aproveita oportunidade ida ne’e ho di’ak hodi aprende no hasa’e imi nia koñesimentu kona-ba oinsá uza internet ho kuidadu no responsavel,” Benedita konklui.
Jornalista: Camilio de Sousa
Editór: Filomeno Martins
