COVALIMA, 01 fevereiru 2024 (TATOLI) – Servisu Agrikultura Covalima iha atividade kuda ai-oan iha fulan-fevereiru, tanba ne’e daudaun prepara ona plantasaun hamutuk 1.700 hodi kuda iha postu administrativu Fatumea, Tilomar, Maucatar no Suai.
Diretór Agrikultura Covalima, Reinaldo Moniz Coli, dehan ai-oan ne’ebé atu kuda ne’e fornese husi Diresaun Nasionál Ortikultura mak hanesan fini rambutaun hun rihun, has 500 no durian 200.
“Bazeia ba identifikasaun tékniku husi Agrikultura has hun 200 sei kuda iha postu administrativu Suai, Maucatar, Tilomar no Maucatar no ai-oan rambutaun ho durian sei kuda iha postu administrativu Fatumea”, Reinaldo Moniz Coli dehan, ohin.
Tuir planu, ai-oan hirak ne’e sei kuda iha semana daruak fulan-fevereiru, tanba molok atu kuda tékniku Agrikultura sira identifika uluk fatin atu kuda ai refere.
Agrikultór Evaristo do Carmo agradese ba Servisu Agrikultura Covalima tanba distribui ai sira ne’e ba komunidade no iha kedan tesmpu udan maka ai hirak ne’e sei bele moris.
“Agikultura atu distribui ai-oan ne’e programa ida di’ak tanba agora tempu udan nune’e ita kuda ai-oan hirak ne’e bele moris”, reitera.
Aleinde plantasaun selu, Floresta Covalima liuhusi Programa Viveiru Komunitáriu prepara mós ona ai-kameli 1.500, iha postu administrativu Tilomar, atu distribui ba agrikultór sira ne’ebé iha inisiativa hakarak kuda plantasaun ne’e iha sira-nian to’os.
Kritéria distribuisaun ai-kameli mak agrikultór sira tenke hato’o pedidu ba Floresta hafoin tékniku sei observa sira-nian to’os, bainhira sira kuda ai-kameli bele seguru ka la’e no tékniku sira sei haree mós distánsia kuda ai refere.
Rekorde katak Ministériu Agrikultura Pekuária, Peska no Floresta no Sekretaria Estadu Floresta halo ona produsaun viveiru ai-kameli hamutuk rihun 60 iha 2023.
Viveiru ne’e prodús iha sentru permanente iha Maubara, Liquiçá, Manufahi, Viqueque no Lautém, nomós viveiru komunitária hamutuk unidade ualu iha munisípiu sira hanesan Aileu, Ainaro, Baucau, Bobonaro, Cavalima, Mantuto no Ermera.
Notísia relevante: Floresta Covalima prepara ai-kameli 1.500 hodi distribui ba agrikultór sira
Jornalista: Celestina Teles
Editora: Maria Auxiliadora
