COVALIMA, 08 janeiru 2023 (TATOLI) – Floresta Covalima liuhusi Programa Viveiru Komunitáriu prepara ona ai-kameli 1.500, iha postu administrativu Tilomar, atu distribui ba agrikultór-sira ne’ebé iha inisiativa hakarak kuda plantasaun ne’e iha sira-nian to’os.
Xefe Departamentu Reprezentasaun Territóriál Floresta, Planta no Indústria, Domingos Gusmão, hatete tékniku floresta prepara de’it ai-kameli ba agrikultór-sira ne’ebé iha intrese atu kuda, maibé la prepara fatin atu kuda.
Kritéria distribuisaun ai-kameli mak agrikultór sira tenke hato’o pedidu ba floresta hafoin tékniku sei observa sira-nian to’os, bainhira sira kuda ai-kameli bele seguru ka la’e no tékniku sira sei haree mós distánsia kuda ai refere.
“Ai-kemeli iha nia valór ekónomiku ne’ebé boot, maibé to’o agora ita seidauk fa’an, tanba Estadu bandu”, nia afirma.
Nune’e, tékniku floresta sira iha obrigasaun atu motiva agrikultór sira atu kontinua kuda ai-kameli ho kuidadu tanba iha benefísiu ekónomiku.
Aleinde floresta Covalima prepara ai-kameli, sira mós prepra espésie ai sira hanesan mahoni, saria no seluk tan.
Agrikultór João Amarál salienta katak nia iha ona fatin atu kuda ai-kameli, maibé sei halo lutu, nune’e bainhira kuda karik bele moris.
“Ha’u agora prepara fatin hodi halo lutu atu kuda ai-kameli iha ha’u-nian to’os. Ha’u seidauk hato’o pedidu ba floresta hodi husu”, dehan.
Notísia relevante: MAPPF halo produsaun viveiru ai-kameli hamutuk 600.000 iha tinan 2023
Jornalista: Celestina Teles
Editora: Maria Auxiliadora
